لاہور “جعلی برآمدگی” اسکینڈل بے نقاب، ایس ایچ او کا انکشاف ،ڈی آئی جی آپریشنز کا نوٹس، منشیات کہاں سے آئی ؟

تحریر:اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
صوبائی دارالحکومت لاہور میں پولیس کے اندر مبینہ طور پر جعلی برآمدگیوں اور ناجائز مقدمہ کے اندراج کا ایک سنگین معاملہ سامنے آ گیا ہے، جس نے قانون نافذ کرنے والے ادارے کی کارکردگی پر کئی سوالات کھڑے کر دیے ہیں۔ ذرائع کے مطابق ایک ویڈیو میں لاہور پولیس کے ایک ایس ایچ او نے ڈی آئی جی آپریشنز فیصل کامران کے سامنے انکشاف کیا کہ اعلیٰ افسران کی جانب سے غیر قانونی احکامات دیے جاتے ہیں، جن کے تحت ملزمان پر اصل برآمدگی سے زیادہ منشیات اور شراب ڈال کر مقدمات درج کیے جاتے ہیں۔ ایس ایچ او کا کہنا تھا کہ انہیں ہدایت دی گئی ہے کہ کسی بھی ملزم کے خلاف 20 لیٹر سے کم شراب کا مقدمہ درج نہ کیا جائے۔

اس انکشاف کے بعد یہ سوال شدت اختیار کر گیا ہے کہ اگر کسی ملزم سے کم مقدار برآمد ہو تو باقی شراب کہاں سے لائی جاتی ہے؟ کیا پولیس کے پاس پہلے سے موجود ہوتی ہے یا جعلی طور پر شامل کی جاتی ہے؟ واضع رہے کہ یہی طرزِ عمل منشیات کی برآمدگی کے معاملات میں بھی اپنایا جا رہا ہے، جس سے پورا نظام مشکوک ہو جاتا ہے۔ ڈی آئی جی آپریشنز فیصل کامران نے اس صورتحال پر برہمی کا اظہار کرتے ہوئے ایس ایچ او کی سرزنش کی اور کہا کہ آپ نے غلط حکم کی تعمیل کیوں کی آپ کو چاہئے تھا ایس ایچ او شپ چھوڑ دیتے تاہم، مبینہ طور پر ایسے غیر قانونی احکامات دینے والے افسران کے خلاف کارروائی کا حکم نہیں دیا گیا
اگر لاہور جیسے بڑے شہر میں یہ صورتحال ہے تو دیگر اضلاع میں حالات کا اندازہ لگانا مشکل نہیں۔ تاہم ڈی آئی جی آپریشنز کی جانب سے اس معاملے کو سنجیدگی سے لینا اور ممکنہ طور پر سسٹم کی خرابیوں کو بے نقاب کرنا ایک مثبت پیش رفت قرار دیا جا رہا ہے۔