لاہور کے علاقے شفیق آباد میں پیش آنے والے دل دہلا دینے والے قتل کیس میں پولیس نے اہم پیش رفت کرتے ہوئے ملزم و گرفتار کر لیا۔ انویسٹی گیشن تھانہ شفیق آباد شاہزیب کمبوہ نے اپنی ٹیم کے ہمراہ کارروائی کرتے ہوئے سفاک قاتل کو قانون کی گرفت میں لے لیا۔
پولیس کے مطابق چند روز قبل 32 سالہ نمرہ کو اس کے ہی گھر میں بے دردی سے چھریوں کے وار کر کے قتل کر دیا گیا تھا۔ واقعہ اس وقت پیش آیا جب مقتولہ کا شوہر اپنی والدہ کو چیک اپ کے لیے نجی اسپتال لے گیا ہوا تھا، جبکہ نمرہ اپنے دو سالہ بیٹے کے ساتھ گھر میں اکیلی موجود تھی۔
ابتدائی تفتیش میں انکشاف ہوا کہ ملزم ڈکیتی کی نیت سے گھر میں داخل ہوا اور مزاحمت پر نمرہ نے اسے پہچان لیا۔ شناخت کے خوف سے ملزم نے انسانیت کی تمام حدیں پار کرتے ہوئے اسے قتل کر دیا اور موقع سے فرار ہو گیا۔ ملزم واردات کے دوران تقریباً 10 لاکھ روپے نقدی بھی لوٹ کر لے گیا تھا۔ پولیس نے پیشہ ورانہ مہارت اور ہیومن انٹیلیجنس کی مدد سے ملزم کو ٹریس کر کے گرفتار کیا، جبکہ اس کے قبضے سے لوٹی گئی رقم بھی برآمد کر لی گئی ہے۔
ڈی آئی جی انویسٹی گیشن لاہور سید ذیشان رضا اور ایس ایس پی محمد نوید نے واضح کیا کہ وزیر اعلیٰ پنجاب کی ہدایات کے مطابق خواتین اور بچوں کے خلاف جرائم میں ملوث عناصر کے ساتھ کسی قسم کی رعایت نہیں برتی جائے گی۔ انہوں نے عزم ظاہر کیا کہ مضبوط پراسیکیوشن کے ذریعے ملزم کو قرار واقعی سزا دلوائی جائے گی۔