ڈیجیٹل منشیات، تباہ ہوتی نوجوان نسل: آن لائن نیٹ ورک بے نقاب،،، بڑے بڑے نام

بھکر ( بے نقاب نیوز )
ٹیکنالوجی کے نام پر جہاں سہولتیں بڑھ رہی ہیں وہیں سماجی برائیاں بھی نئے اور خطرناک روپ اختیار کر چکی ہیں۔ بھکر میں سی سی ڈی پولیس کی کارروائی نے اس تلخ حقیقت کو ایک بار پھر عیاں کر دیا ہے کہ منشیات فروش اب گلی محلوں کے بجائے موبائل اسکرین کے ذریعے ہماری نوجوان نسل کو نشانہ بنا رہے ہیں۔
سی سی ڈی بھکر نے آن لائن منشیات فروخت کرنے والے ملزم سلیمان کو گرفتار کر لیا ہے، جو مختلف ڈیجیٹل ایپلیکیشنز کے ذریعے اپنے صارفین سے رابطہ رکھتا تھا اور خفیہ انداز میں منشیات سپلائی کرتا تھا۔ پولیس کے مطابق ملزم کے گاہکوں میں نوجوان لڑکے ہی نہیں بلکہ لڑکیاں بھی شامل تھیں، جو اس بات کی خطرناک علامت ہے کہ یہ ناسور معاشرے کی جڑوں میں کس حد تک سرایت کر چکا ہے۔ تحقیقات سے معلوم ہوا ہے کہ ملزم جدید ٹیکنالوجی کا استعمال کرتے ہوئے آرڈر وصول کرتا، لوکیشن شیئر کر کے ڈیلیوری مکمل کرتا اور خود کو قانون کی نظروں سے اوجھل رکھنے کی پوری کوشش کرتا تھا۔ یہ طریقۂ واردات اس امر کی نشاندہی کرتا ہے کہ منشیات کا کاروبار اب روایتی نہیں رہا بلکہ ڈیجیٹل نیٹ ورکس کے ذریعے خاموشی سے نسلوں کو برباد کر رہا ہے۔
ماہرینِ سماجیات کے مطابق آن لائن منشیات کی دستیابی نوجوانوں کو تیزی سے ذہنی، اخلاقی اور جسمانی تباہی کی طرف دھکیل رہی ہے۔ تعلیمی اداروں، والدین اور ریاستی اداروں کی مشترکہ غفلت اس بحران کو مزید سنگین بنا رہی ہے۔ خاص طور پر نوجوان لڑکیوں کا اس دلدل میں پھنسنا معاشرتی اقدار اور مستقبل دونوں کے لیے خطرے کی گھنٹی ہے۔
سی سی ڈی نے ملزم کی گرفتاری ظاہر نہیں کی کیونکہ وہ اس نیٹورک سے منسلک دیگر ملزمان کو گرفتارکرنے میں کوشاں ہے ایسے کتنے سلیمان ہیں جو ابھی تک ڈیجیٹل پردوں کے پیچھے بیٹھ کر زہر بیچ رہے ہیں؟ سی سی ڈی انکا محاسبہ کرنے کے لئے کوشاں ہے