اسلام آباد :قائداعظم یونیورسٹی اسلام آباد کے گرلز ہاسٹل میں سیکیورٹی کی سنگین خلاف ورزی کا واقعہ سامنے آیا ہے، جہاں گزشتہ رات تقریباً 2 بجے ایک نامعلوم شخص ہاسٹل میں داخل ہوگیا جسے بعد ازاں ہاسٹل کے واش روم میں دیکھا گیا۔پولیس نے نوجوان کو گرفتار کرکے مقدمہ درج کرلیا۔
ہاسٹل میں داخل ہونے والے نامعلوم شخص کی ویڈیو بھی سوشل میڈیا پر وائرل ہو رہی ہے، جس میں وہ خود کو راول ڈیم کا رہائشی قرار دیتے ہوئے کہتا ہے کہ وہ پہلی مرتبہ ہاسٹل آیا ہے۔
واقعے کے بعد ہاسٹل میں شدید خوف و ہراس پھیل گیا جبکہ طالبات نے یونیورسٹی انتظامیہ کی جانب سے بروقت اور مؤثر کارروائی نہ ہونے پر شدید تحفظات کا اظہار کیا ہے۔ طالبات کے مطابق مذکورہ شخص رات 2:40 منٹ پر ہاسٹل میں دیکھا گیا جبکہ اسے3:40 منٹ پر قابو میں کیا گیا، جو سیکیورٹی کی سنگین غفلت کو ظاہر کرتا ہے۔ایک گھنٹے کے دوران مذکورہ شخص ہاسٹل میں کیا سرگرمیاں انجام دیتا رہا اس کا بھی جواب دیا جائے۔ طالبات کے مطابق وہ واش روم میں گانے گاتا بھی پایا گیا۔