پشاور: خصوصی بچوں کے عالمی دن کے موقع پر پشاور میں امید سپیشل ایجوکیشن سکول (USES) کے زیرِ اہتمام ایک پروقار تقریب منعقد کی گئی، جس میں کور کمانڈر پشاور نے بطور مہمانِ خصوصی شرکت کی۔ تقریب کے دوران خصوصی بچوں نے دلکش ٹیبلوز، ثقافتی پروگرامز اور ملی نغموں کے ذریعے اپنی خداداد صلاحیتوں کا شاندار مظاہرہ کیا۔ کور کمانڈر پشاور نے سپیشل بچوں کے تیار کردہ سائنسی، فنی اور تصویری ماڈلز کا معائنہ کیا اور ان کی تخلیقی صلاحیتوں کو سراہا۔
مہمانِ خصوصی نے بچوں کی صلاحیتوں کو نکھارنے میں امید سپیشل ایجوکیشن سکول کی انتھک کاوشوں کو خراجِ تحسین پیش کیا۔ تقریب میں بتایا گیا کہ امیدسپیشل ایجوکیشن سکول میں اس وقت 188 خصوصی بچے زیرِ تعلیم ہیں، جہاں انہیں معیاری تعلیم و تربیت فراہم کی جا رہی ہے۔ اس موقع پر اس امر پر بھی زور دیا گیا کہ خصوصی بچوں کی تعلیم و تربیت ایک اجتماعی ذمہ داری ہے۔ تقریب میں یہ بھی بتایا گیا کہ امید سپیشل ایجوکیشن سکول کے تین ہونہار طلبہ بین الاقوامی مقابلوں میں پاکستان کی نمائندگی کر چکے ہیں۔
