راولپنڈی :چیف آف ڈیفنس فورسز اور چیف آف آرمی سٹاف فیلڈ مارشل سید عاصم منیرنے مملکتِ سعودی عرب کے سرکاری دورے کے دوران سعودی عرب کے وزیرِ دفاع شہزادہ خالد بن سلمان بن عبدالعزیز آل سعود سے ملاقات کی۔پیر کو پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران باہمی دلچسپی کے امور پر تبادلہ خیال کیا گیا جن میں علاقائی سلامتی کی صورتحال، دفاعی و عسکری تعاون، اسٹریٹجک اشتراکِ عمل اور بدلتے ہوئے جیو اسٹریٹجک چیلنجز شامل تھے۔
#ISPR
Rawalpindi, 22 December 2025Field Marshal Syed Asim Munir, NI (M), HJ, #COAS & CDF #Pakistan, called on His Royal Highness Prince Khalid bin Salman bin Abdulaziz Al Saud (@kbsalsaud) Minister of Defence of the Kingdom of Saudi Arabia (KSA), during his official visit to… pic.twitter.com/GuQif6jHEH
— Pakistan Armed Forces News 🇵🇰 (@PakistanFauj) December 22, 2025
اس موقع پر پاکستان اور سعودی عرب کے مابین گہرے، تاریخی اور برادرانہ تعلقات کی ایک بار پھر توثیق کی گئی۔خادمِ حرمینِ شریفین شاہ سلمان بن عبدالعزیز آل سعود کے جاری کردہ شاہی فرمان کے تحت فیلڈ مارشل سید عاصم منیر کو مملکتِ سعودی عرب کا اعلیٰ ترین قومی اعزاز کنگ عبدالعزیز میڈل (اعلیٰ درجے) بھی عطا کیا گیا۔یہ اعزاز فیلڈ مارشل سید عاصم منیر کی شاندار عسکری خدمات اور قیادت، پاکستان اور سعودی عرب کے درمیان دفاعی تعاون، اسٹریٹجک ہم آہنگی اور ادارہ جاتی روابط کے فروغ میں ان کے کلیدی کردار کا اعتراف ہے۔
یہ اعزاز علاقائی امن و استحکام کے لیے ان کی خدمات، بالخصوص انسدادِ دہشت گردی اور سلامتی کے شعبوں میں مسلسل تعاون کی عکاسی بھی کرتا ہے۔سعودی قیادت نے فیلڈ مارشل سید عاصم منیر کی پیشہ ورانہ صلاحیتوں اور اسٹریٹجک وژن کو سراہتے ہوئے دونوں ممالک کے دیرینہ، برادرانہ تعلقات کو مضبوط بنانے کے لیے ان کے عزم کی تعریف کی۔
فیلڈ مارشل سید عاصم منیر نے خادمِ حرمینِ شریفین اور سعودی قیادت کا اعزاز دینے پر شکریہ ادا کرتے ہوئے اسے پاکستان اور سعودی عرب کے درمیان مضبوط اور پائیدار تعلقات کی علامت قرار دیا۔ انہوں نے مملکتِ سعودی عرب کی سلامتی، استحکام اور خوشحالی کے لیے پاکستان کے عزم کا اعادہ کیا۔کنگ عبدالعزیز میڈل (اعلیٰ درجے) کی یہ اعزازی تقریب پاکستان اور سعودی عرب کے تعلقات کی گہرائی اور علاقائی و عالمی امن کے فروغ کے لیے دونوں ممالک کے مشترکہ عزم کی عکاس ہے۔