سیالکوٹ (سلیم احمد اعوان شیخو)
سیالکوٹ کے معروف اور مصروف ترین لہائی بازار میں مسلح راہزنوں نے اسلحے کی نوک پر سیلز مین سے 26 لاکھ روپے لوٹ لیے اور سنگین نتائج کی دھمکیاں دیتے ہوئے باآسانی فرار ہو گئے۔تفصیلات کے مطابق جوتوں کے تاجر "شیخ عبد الماجد چپل اسٹور” کا سیلز مین مبشر موٹر سائیکل پر 26 لاکھ روپے بینک میں جمع کروانے جا رہا تھا کہ لہائی بازار کے قریب پیچھے سے ہونڈا 125 موٹر سائیکل پر سوار دو نامعلوم مسلح راہزنوں نے اسے روک لیا۔ ملزمان نے اسلحے کے زور پر مبشر سے 26 لاکھ روپے چھین لیے اور جاتے ہوئے خطرناک و سنگین نتائج کی دھمکیاں دیتے ہوئے فرار ہو گئے۔واقعے کی اطلاع ملتے ہی متعلقہ تھانے کی پولیس، سب ڈویژنل پولیس آفیسر (ایس ڈی پی او) سٹی سرکل اسسٹنٹ سپرنٹنڈنٹ آف پولیس (اے ایس پی) مس بشریٰ کے ہمراہ فوری طور پر موقع پر پہنچ گئی۔ پولیس نے جائے وقوعہ کا مکمل جائزہ لیا اور شواہد اکٹھے کیے۔ اس موقع پر ایس ڈی پی او مس بشریٰ نے تاجر برادری کو جلد از جلد راہزنوں کی گرفتاری اور رقم کی برآمدگی کی یقین دہانی کروائی۔پولیس نے سیلز مین مبشر کی مدعیت میں مقدمہ درج کر کے ملزمان کی تلاش اور گرفتاری کے لیے مختلف سائٹس پر چھاپے مارنے شروع کر دیے ہیں۔