پولیس ولنٹیئر پروگرام میں نوکری کا جھانسہ دے کر پیسے بٹورنے والا ملزم اپنی بارات پرگرفتار

لاہور: طلبہ کو پولیس ولنٹیئر پروگرام اور نوکری کا جھانسہ دے کر لاکھوں روپے بٹورنے والا مکروہ دھندہ کرنے والا ملزم فرحان اپنی ہی شادی کی تقریب سے پولیس کے ہتھے چڑھ گیا۔
ترجمان ڈی آئی جی آپریشنز کے مطابق، ملزم فرحان معصوم طلبہ کو پولیس ولنٹیئر پروگرام میں شمولیت اور سرکاری نوکری دلوانے کا جھانسہ دے کر ان سے بھاری رقم بٹور رہا تھا۔ متاثرہ طلبہ نے اس فراڈ کی شکایات براہِ راست ڈی آئی جی آپریشنز کو پیش کیں، جن کا نوٹس لیتے ہوئے ڈی آئی جی آپریشنز نے فوری طور پر خفیہ انکوائری کا حکم دیا۔
انکوائری کے دوران طلبہ کے تمام الزامات درست ثابت ہوئے، جس پر فوری طور پر مقدمہ درج کر کے تھانہ نشتر کالونی پولیس نے کارروائی کا آغاز کیا۔ پولیس نے چالاکی سے کارروائی کرتے ہوئے ملزم کو اس کی شادی کی تقریب کے دوران ہی گرفتار کر لیا۔
ڈی آئی جی آپریشنز فیصل کامران نے اس موقع پر واضح کیا ہے کہ "پولیس ولنٹیئر پروگرام طلبہ کو پولیس کے ساتھ رضاکارانہ طور پر منسلک کرنے کا ایک باقاعدہ پلیٹ فارم ہے، جس کے لیے کسی قسم کی فیس یا رقم نہیں لی جاتی۔”
انہوں نے طلبہ اور شہریوں کو خبردار کرتے ہوئے کہا ہے کہ:
طلبہ اس پروگرام میں شمولیت یا نوکری کے نام پر کسی کو بھی ہرگز رقم نہ دیں۔
نوکری یا پروگرام کے نام پر پیسے مانگنے والے عناصر سے ہوشیار رہیں۔
ایسے کسی بھی فراڈ یا جعل سازی کی اطلاع فوری طور پر پولیس کو دیں تاکہ بروقت کارروائی عمل میں لائی جا سکے۔