عزم کی لازوال داستان: ننگے پاؤں اور ساڑھی پہن کر 1,600 میٹر دوڑنے والی بیوہ کویتا کماری کی کہانی سوشل میڈیا پر وائرل

جھارکھنڈ: زندگی کی صعوبتوں اور مشکلات کو شکست دینے کی ایک انتہائی جذباتی اور دل کو چھو لینے والی مثال سامنے آئی ہے۔
جھارکھنڈ کے رام گڑھ ضلع کے سوسو گاؤں سے تعلق رکھنے والی ایک بیوہ اور بچوں کی ماں، کویتا کماری، نے ہوم گارڈ کی اسامی پر بھرتی کے لیے نہ صرف روایتی لباس (ساڑھی) میں دوڑ میں حصہ لیا بلکہ ننگے پاؤں 1,600 میٹر کا کٹھن جسمانی ٹرائل کامیابی سے مکمل کرکے سب کو حیران کر دیا۔رپورٹس کے مطابق، کویتا کماری نے ریس شروع ہونے سے پہلے اپنی چپلیں اتار دیں اور اسٹیڈیم میں موجود شائقین کے پرجوش نعروں اور حوصلہ افزائی کے درمیان عزم و حوصلے کی نئی تاریخ رقم کرتے ہوئے کئی جوان امیدواروں کو پیچھے چھوڑ دیا۔ ان کی یہ ویڈیو سوشل میڈیا پر تیزی سے وائرل ہو رہی ہے، جہاں لوگ ان کے غیر معمولی جذبے اور جرأت کو بھرپور خراج تحسین پیش کر رہے ہیں۔