سرگودھا: خوشاب روڈ پر کار، موٹرسائیکل اور چنگ چی رکشے میں خوفناک تصادم، طالب علم جاں بحق

سرگودھا: خوشاب روڈ پر عزیز بھٹی ٹاؤن کے قریب ایک کار، موٹرسائیکل اور چنگ چی رکشے کے درمیان پیش آنے والے خوفناک تصادم کے نتیجے میں ایک طالب علم جاں بحق جبکہ دو افراد زخمی ہو گئے ہیں۔
ریسکیو ذرائع کے مطابق حادثے میں جاں بحق ہونے والے 18 سالہ طالب علم کی شناخت علی حسن سکنہ جھاوریاں کے نام سے ہوئی ہے۔ اس حادثے میں زخمی ہونے والوں میں 17 سالہ طالب علم محمد سبطین اور ایک 55 سالہ نامعلوم شخص شامل ہیں۔
اطلاع ملتے ہی ریسکیو اہلکار فوری طور پر جائے حادثہ پر پہنچ گئے اور دونوں زخمیوں سمیت جاں بحق ہونے والے طالب علم کی میت کو فوری طبی امداد اور قانونی کارروائی کے لیے ڈاکٹر فیصل مسعود ٹیچنگ ہسپتال سرگودھا منتقل کر دیا ہے۔