سیالکوٹ۔سلیم احمد اعوان شیخو
ڈپٹی کمشنر سیالکوٹ اویس مشتاق کی ہدایت پر ایڈمنسٹریٹر میونسپل کارپوریشن سیالکوٹ میاں سرمد حسین نے چہلم حضرت امام حسینؓ کے مرکزی جلوس کے روٹ کا تفصیلی دورہ کیا اور جلوس کے شرکاء کو بہترین شہری سہولیات کی فراہمی کے لیے جاری انتظامات کا جائزہ لیا۔
اس موقع پر اسسٹنٹ کمشنر سیالکوٹ رانا صفدر شبیر، چیف آفیسر میونسپل کارپوریشن سیالکوٹ زبیر وٹو اور متعلقہ افسران بھی ان کے ہمراہ تھے۔
ایڈمنسٹریٹر میونسپل کارپوریشن نے جلوس کے روٹ پر جاری پیچ ورک، سڑکوں کی مرمت اور دیگر ترقیاتی منصوبوں کا معائنہ کیا اور متعلقہ افسران کو ہدایت کی کہ تمام ترقیاتی کام مقررہ مدت کے اندر ہر صورت مکمل کیے جائیں تاکہ عزاداران کو کسی قسم کی دشواری کا سامنا نہ کرنا پڑے۔
انہوں نے روٹ پر صفائی ستھرائی کے انتظامات، سیوریج کی صورتحال، اسٹریٹ لائٹس کی فعالیت اور بیک اپ جنریٹرز کی دستیابی کا بھی جائزہ لیا۔ انہوں نے ہدایت کی کہ جلوس کے انعقاد سے قبل تمام اسٹریٹ لائٹس مکمل طور پر فعال ہوں اور بجلی کی ممکنہ بندش کی صورت میں بیک اپ جنریٹرز ہر وقت تیار رکھے جائیں۔
میاں سرمد حسین نے متعلقہ افسران کو ہدایت کی کہ جلوس کے روٹ پر صفائی کے انتظامات کو مزید مؤثر بنایا جائے، تعمیراتی ملبہ اور دیگر رکاوٹیں فوری طور پر ہٹائی جائیں اور تمام شہری سہولیات کی فراہمی کو یقینی بنایا جائے تاکہ چہلم حضرت امام حسینؓ کے موقع پر عزاداران کو پرامن، محفوظ اور سہولت بخش ماحول میسر آ سکے۔