ٹنڈوالہیار رپورٹ تیمور رضا قائم خانی
ڈپٹی کمشنر ٹنڈوالہیار نور مصطفیٰ لغاری کی ہدایات پر ایڈیشنل ڈپٹی کمشنر ون آصف علی خاصخیلی کی زیر صدارت حضرت امام حسینؑ کے چہلم کے سلسلے میں انتظامات کا جائزہ لینے کے لیے ایک اہم اجلاس آج کانفرنس ہال ڈپٹی کمشنر آفس میں منعقد ہوا اجلاس میں ایڈیشنل ڈپٹی کمشنر ٹو میڈم صوبیہ عابد، اسسٹنٹ کمشنر ٹنڈوالہیار بابر صالح راہپوٹہ، اسسٹنٹ کمشنر جھنڈو مری شہزادو عمیر جروار، ڈسٹرکٹ انفارمیشن آفیسر ٹنڈوالہیار علی مراد پتافی، محکمہ صحت، پولیس، حیسکو، بلدیات اور دیگر متعلقہ محکموں کے ضلعی افسران کے علاوہ مختلف مکاتبِ فکر سے تعلق رکھنے والے علماء کرام نے شرکت کی اجلاس سے خطاب کرتے ہوئے ایڈیشنل ڈپٹی کمشنر ون آصف علی خاصخیلی نے متعلقہ محکموں کے افسران کو ہدایت کی کہ حضرت امام حسینؑ کے چہلم کے موقع پر ضلع بھر میں امن و امان کے قیام، صفائی ستھرائی، پینے کے صاف پانی کی فراہمی، ماتمی جلوسوں کے روٹس پر اسٹریٹ لائٹس، سیکیورٹی اور دیگر تمام ضروری انتظامات کو ہر صورت یقینی بنایا جائے تاکہ عزاداران اور شہریوں کو کسی قسم کی دشواری کا سامنا نہ کرنا پڑے انہوں نے مختلف مکاتبِ فکر سے تعلق رکھنے والے علماء کرام سے اپیل کی کہ وہ چہلمِ شہدائے کربلا کے موقع پر بھائی چارے، رواداری، برداشت اور باہمی ہم آہنگی کو فروغ دیں اور جلسوں و جلوسوں کے دوران شرپسند عناصر پر کڑی نظر رکھیں ایڈیشنل ڈپٹی کمشنر ون نے محکمہ صحت کے افسران کو ہدایت کی کہ ماتمی جلوسوں کے ہمراہ ڈاکٹروں، ایمبولینسوں اور ادویات کی دستیابی کو یقینی بنایا جائے۔ انہوں نے محکمہ بلدیات کو جلوسوں کی گزرگاہوں پر صفائی ستھرائی اور اسٹریٹ لائٹس کی مکمل فعالیت برقرار رکھنے کی ہدایت کی، جبکہ حیسکو حکام کو چہلم کے دوران بالخصوص رات کے اوقات میں بلا تعطل بجلی کی فراہمی یقینی بنانے اور لوڈشیڈنگ کا مناسب شیڈول مرتب کرنے کی ہدایت کی اس موقع پر مختلف مکاتبِ فکر سے تعلق رکھنے والے علماء کرام نے ضلعی انتظامیہ کی جانب سے چہلمِ شہدائے کربلا کے سلسلے میں کیے گئے انتظامات پر اطمینان کا اظہار کرتے ہوئے ہر ممکن تعاون کی یقین دہانی کرائی۔