لاہور:گیانا میں شیڈول گلوبل سپر لیگ (GSL) کے لیے لاہور قلندرز نے اپنی تیاریوں کو حتمی شکل دیتے ہوئے اپنے اسکواڈ اور کوچنگ اسٹاف کا باضابطہ اعلان کر دیا ہے۔ نیوزی لینڈ کے جارح مزاج آل راؤنڈر مائیکل بریسویل ایونٹ میں لاہور قلندرز کی قیادت کریں گے۔
لاہور قلندرز کی جانب سے جاری کردہ اسکواڈ میں نوجوان ٹیلنٹ اور تجربہ کار کھلاڑیوں کا حسین امتزاج نظر آتا ہے۔ ٹیم میں مائیکل بریسویل (کپتان) کے ساتھ پرویز حسین، شایان جہانگیر، ڈیلانو پوٹگیر، قومی کرکٹر عبداللہ شفیق، اسامہ میر، شامل حسین، محمد نعیم، عمران رندھاوا، مہران ممتاز، فرحان یوسف، شہاب خان، محمد باسط اور علی شبیر شامل ہیں۔
لاہور قلندرز نے آسٹریلیا کے سابق تیز رفتار فاسٹ بولر شان ٹیٹ کو اپنی ٹیم کا ہیڈ کوچ مقرر کیا ہے۔ چیف ایگزیکٹو آفیسر عاطف رانا نے ایک پریس کانفرنس کے دوران اس تقرری کا اعلان کرتے ہوئے کہا کہ شان ٹیٹ کا بین الاقوامی کرکٹ کا وسیع تجربہ اور ان کی جارحانہ سوچ ٹیم کے لیے ایک اثاثہ ثابت ہوگی۔
Locked. Loaded. Qalandar. 💚
Here's your Lahore Qalandars squad for the Global Super League 2026.#QalandarDilSe #Number1TeamForAReason #gslt20 pic.twitter.com/Qv6dJb0WiF
— Lahore Qalandars (@lahoreqalandars) July 13, 2026
اس موقع پر گفتگو کرتے ہوئے عاطف رانا نے کہا کہ "ہمارا مقصد نوجوان کھلاڑیوں کو عالمی سطح پر اپنی صلاحیتیں دکھانے کا موقع فراہم کرنا ہے۔ شان ٹیٹ کی کوچنگ میں یہ ٹیم نئی بلندیوں کو چھوئے گی۔” انہوں نے مزید کہا کہ گلوبل سپر لیگ لاہور قلندرز کے کھلاڑیوں کے لیے سیکھنے اور اپنی کارکردگی کو مزید بہتر بنانے کا بہترین پلیٹ فارم ہے۔
گلوبل سپر لیگ کا آغاز 23 جولائی سے گیانا میں ہوگا اور یہ ٹورنامنٹ یکم اگست تک جاری رہے گا۔ لاہور قلندرز اپنے سفر کا آغاز 23 جولائی کو آسٹریلیا کی مضبوط ٹیم ‘پرتھ اسکارچرز’ کے خلاف میچ سے کرے گی۔ شائقین کرکٹ اس لیگ میں لاہور قلندرز کی کارکردگی دیکھنے کے لیے انتہائی پرجوش ہیں