شیخوپورہ: معمولی رنجش پر خونی تصادم، صابری روڈ پر فائرنگ سے 24 سالہ نوجوان جاں بحق

شیخوپورہ:( رپورٹ اسامہ طفیل )
تھانہ اے ڈویژن کے علاقے صابری روڈ پر معمولی تلخ کلامی نے ایک نوجوان کی جان لے لی۔ پولیس کے مطابق تاجو نان ٹکیوں والی دکان کے قریب حماد بٹ اور شاہ زیب نامی ملزمان نے اندھا دھند فائرنگ کر دی، جس کے نتیجے میں 24 سالہ سفیان اجمل موقع پر ہی دم توڑ گیا، جبکہ مقتول کے دیگر ساتھی معجزانہ طور پر محفوظ رہے۔
واقعے کے بعد اے ڈویژن پولیس نے مقتول کے بھائی رضوان اجمل کی مدعیت میں نامزد ملزمان کے خلاف مقدمہ درج کر لیا ہے۔ پولیس حکام کا کہنا ہے کہ ملزمان کی گرفتاری کے لیے مختلف مقامات پر چھاپے مارے جا رہے ہیں، تاہم تاحال کوئی گرفتاری عمل میں نہیں آ سکی۔ مقتول کی لاش کو پوسٹ مارٹم کے بعد لواحقین کے حوالے کر دیا گیا، جسے مقامی قبرستان میں سپردِ خاک کر دیا گیا ہے۔