ہرارے:زمبابوے میں جاری انڈر 19 ورلڈ کپ کے گروپ سی کے افتتاحی میچ میں انگلینڈ نے پاکستان کو 36 رنز سے شکست دے کر فاتحانہ آغاز کردیا ہے۔
جمعے کو ہرارے میں کھیلے گئے انڈر 19 ورلڈ کپ کے چوتھے میچ میں پاکستان کی دعوت پر پہلے بیٹنگ کرتے ہوئے انگلینڈ کی ٹیم 47 ویں اوور میں 210 رنز بناکر ڈھیر ہوگئی تاہم 211 رنز کے ہدف کے تعاقب میں قومی ٹیم 47 ویں اوور میں 173 رنز بناکر آؤٹ ہوگئی۔
پاکستان کی شاندار بولنگ کے سامنے انگلش بیٹرز کھل کر نہ کھیل سکے اور انگلینڈ کی جانب سے کالیب فالکنر66 رنز بنا کر ٹاپ اسکورر رہے۔
اس کے علاوہ بین ڈاکنز 33، رالفی البرٹ 25، بین میس 20، فرحان احمد 15، تھامس ریو 14جبکہ جوزف مورز 7 رنز بناکر آؤٹ ہوئے۔
پاکستان کی جانب سے احمد حسین نے 3 وکٹیں حاصل کیں جب کہ علی رضا، عبدالسبحان اور مومن قمر نے 2،2 کھلاڑیوں کو آؤٹ کیا۔
اس طرح پوری انگلینڈ انڈر 19 ٹیم 46.5 اوورز میں 210 رنز بنا کرآؤٹ ہوگئی اور یوں پاکستان انڈر 19 ٹیم کو جیت کے لیے 211 رنز کا ہدف دیا۔
انگلش ٹیم کے دیے گئے 211 رنز کے ہدف کے تعاقب میں پاکستان کی بیٹنگ ابتدا سے ہی لائن مشکلات کا شکار رہی۔ گرین شرٹس کے کپتان فرحان یوسف نے 65 رنز کی نمایاں باری کھیلی جب کہ کوئی اور کھلاڑی خاطر خواہ پرفارمنس دینے میں ناکام ثابت ہوا۔
پاکستانی ٹیم کے اوپنرز سمیر منہاس اور محمد شایان صرف 23 کے مجموعی اسکور پر آؤٹ ہوگئے، اس کے علاوہ احمد حسین 12، حذیفہ احسان 17، عبدالسبحان 14، سمیر منہاس 10، محمد شایان 7 اور عثمان خان 6 رنز بنا سکے جب کہ مومن قمر 19 رنز کے ساتھ ناٹ آوٹ رہے۔
انگلینڈ کے ایلکس گرین، البرٹ اور جیمز منٹو نے 2، 2 کھلاڑیوں کو آؤٹ کیا۔
اس طرح پاکستان انڈر 19 ٹیم 211 رنز کے ہدف کے تعاقب میں 46.3 ویں اوور میں 173رنز بناکر آؤٹ ہوگئی اور یوں آسان ہدف کے تعاقب میں قومی ٹیم کو اپنے پہلے ہی گروپ میچ میں انگلینڈ کے ہاتھوں 37 رنز سے شکست کا سامنا کرنا پڑا۔
یہ شکست پاکستان کے لیے گروپ سی میں پہلا نقصان ہے اورانگلینڈ نے اپنی مضبوط بیٹنگ اورمؤثر بولنگ کے ذریعے میچ پر مکمل کنٹرول رکھا۔
