دریائے چناب میں اونچے درجے کا سیلاب، ریواز برج کے قریب ریلوے لائن اڑا دی گئی

جھنگ: جھنگ کے ضلعی انفارمیشن آفیسر نے وضاحت کی ہے کہ شہر کو سیلاب سے بچانے کے لیے ریواز پل میں شگاف نہیں ڈالا گیا بلکہ موضع ننکانہ ریلوے لائن کے پاس بند میں شگاف ڈالا گیا ہے۔

یاد رہے کہ اس سے قبل پی ڈی ایم اے کی جانب سے بیان جاری کیا گیا تھا کہ جھنگ شہر کو بچانے کے لیے وہاں واقع قدیمی ریواز پل کے بند میں شگاف ڈال دیا گیا ہے۔

واضح رہے کہ دریائے چناب میں اس وقت انتہائی اونچے درجے کا سیلاب ہے۔

دریا میں پانی کی سطح میں مسلسل اضافے کے ساتھ موضع ننکانہ ریلوے لائن تحصیل جھنگ سے شگاف ڈالا گیا ہے۔ ہے جو ریواز پل سے تین کلو میٹر دور ہے۔دریائے چناب میں اس وقت بڑا سیلابی ریلا چنیوٹ میں موجود ہے اور کچھ دیر قبل وہاں سے آٹھ لاکھ 55 ہزار کیوسک پانی گزر رہا تھا۔

پنجاب کے ریلیف کمشنر نبیل جاوید کا کہنا ہے کہ دریائے چناب میں بڑا سیلابی ریلا چنیوٹ اور جھنگ سے ہوتا ہوا تریموں ہیڈ کی طرف تیزی سے بڑھ رہا ہے اور جمعے کی شام وہاں پہنچے گا۔

ریلیف کمشنر کے مطابق سیلاب کے دباؤ کو کم کرنے کے لیے جھنگ میں تین مقامات پر بریچنگ کی گئی ہے۔