واشنگٹن: امریکی اخبار "دی واشنگٹن پوسٹ” کی ایک رپورٹ کے مطابق گزشتہ ہفتے ہونے والے امریکی وسط مدتی انتخابات (مڈ ٹرم الیکشنز) میں ڈیموکریٹک پارٹی کی جانب سے ایوانِ نمائندگان اور سینیٹ میں واضح برتری حاصل کرنے کے بعد خلیجی ممالک سعودی عرب، متحدہ عرب امارات اور قطرامریکی صدر ڈونلڈ ٹرمپ، ان کی انتظامیہ اور خاندان سے جڑے مبینہ مالی معاملات اور کرپشن کی ممکنہ تحقیقات کے اثرات سے نمٹنے کی تیاری کر رہے ہیں۔
امریکی حکام اور خلیجی سفارت کاروں کے حوالے سے شائع ہونے والی اس رپورٹ میں بتایا گیا ہے کہ ڈیموکریٹک قانون سازوں نے ان تینوں ممالک کو خبردار کیا ہے کہ آنے والے دنوں میں ٹرمپ اور ان کے قریبی ساتھیوں سے منسلک رئیل اسٹیٹ معاہدوں، مالیاتی سرمایہ کاری اور تحائف کا باریک بینی سے جائزہ لیا جائے گا۔ قانون سازوں نے یہ تنبیہ بھی کی ہے کہ اگر ان تحقیقات میں تعاون نہ کیا گیا تو واشنگٹن کے ساتھ ان ممالک کے تعلقات، بشمول ہتھیاروں کی فروخت اور سیکیورٹی معاونت، متاثر ہو سکتے ہیں۔
Persian Gulf governments are preparing with dread for the inevitable: A damaging barrage of inquiries into alleged corruption involving President Trump, his administration and family, by Democrats who swept the midterm elections. https://t.co/XHmJ4oV7jO
— The Washington Post (@washingtonpost) November 14, 2026
تاہم سفارت کاروں اور معاملے سے باخبر ذرائع کے مطابق خلیجی حکومتوں کی جانب سے حساس معلومات یا نجی خط و کتابت فراہم کیے جانے کا امکان کم ہے، کیونکہ ان کے خیال میں اس سے سفارتی سبکی ہو سکتی ہے۔ دوسری جانب خلیجی حکومتوں نے اپنے تمام مالی معاملات کو قانونی قرار دیتے ہوئے کسی بھی قسم کی ناجائز رعایت حاصل کرنے کے الزامات کو مسترد کیا ہے، جبکہ وائٹ ہاؤس نے بھی مفادات کے کسی بھی ٹکراؤ کی تردید کی ہے۔
واشنگٹن پوسٹ کے مطابق ان متوقع تحقیقات میں خصوصی توجہ ٹرمپ خاندان سے وابستہ کرپٹو کرنسی کمپنی "ورلڈ لبرٹی فنانشل” میں متحدہ عرب امارات کے ایک ادارے کی جانب سے 50 کروڑ ڈالر کے حصص کی خریداری پر مرکوز رہنے کا امکان ہے۔ رپورٹ میں کہا گیا ہے کہ امارات کے قومی سلامتی کے مشیر شیخ طحنون بن زاید النہیان سے منسلک ایک ادارے نے یہ سرمایہ کاری کی تھی، جس کے کچھ عرصے بعد متحدہ عرب امارات کو جدید امریکی سیمی کنڈکٹر (اے آئی) چپس تک رسائی حاصل ہوئی۔
واضح رہے کہ "ورلڈ لبرٹی فنانشل” کی بنیاد ڈونلڈ ٹرمپ کے تینوں بیٹوں اور امریکی ایلچی اسٹیو وٹکوف کے بیٹے زیک وٹکوف نے رکھی تھی۔ اس معاہدے کے منظرِ عام پر آنے پر ڈیموکریٹک سینیٹر الزبتھ وارن نے اسے "کھلی بدعنوانی” قرار دیا تھا، جبکہ صدر ٹرمپ اس حوالے سے پہلے ہی کہہ چکے ہیں کہ کاروبار ان کے بیٹے چلاتے ہیں اور وہ اس معاملے سے لا علم تھے۔