وزیراعلیٰ پنجاب مریم نواز شریف نے کہا ہے کہ صوبے بھر میں جرائم کی مجموعی شرح میں تقریباً 70 فیصد تک کمی کا رجحان انتہائی خوش آئند ہے اور ڈسٹرکٹ سیف سٹی اتھارٹیز، موبائل پولیس اسٹیشنز اور ڈیجیٹل اسمارٹ پولیسنگ کے مثبت نتائج سامنے آ رہے ہیں۔
بین الاقوامی سطح پر منظم جرائم کی روک تھام کے عالمی دن کے موقع پر جاری اپنے پیغام میں وزیراعلیٰ پنجاب نے اعداد و شمار کا حوالہ دیتے ہوئے بتایا کہ گوجرانوالہ میں جرائم کی شرح میں 67 فیصد، گجرات میں 58 فیصد، بہاولپور میں 52 فیصد، ملتان میں 47 فیصد، ساہیوال میں 42 فیصد، لاہور میں 41 فیصد، راولپنڈی میں 36 فیصد، شیخوپورہ میں 32 فیصد اور ڈیرہ غازی خان میں 16 فیصد کمی ریکارڈ کی گئی ہے۔ مریم نواز شریف نے اس عزم کا اعادہ کیا کہ انسانی اسمگلنگ، منشیات اور جرائم پیشہ نیٹ ورکس کے مکمل خاتمے کے لیے جدید ٹیکنالوجی، انٹیلی جنس شیئرنگ، قانون نافذ کرنے والے اداروں کی استعداد کار میں اضافے اور عالمی تعاون سمیت بلاامتیاز کارروائیاں جاری رکھی جائیں گی تاکہ خواتین، بچوں اور نوجوانوں کو محفوظ بناتے ہوئے ایک پرامن اور انصاف پر مبنی معاشرہ تشکیل دیا جا سکے۔
پنجاب میں جرائم کی شرح میں 70 فیصد کمی خوش آئند،اسمارٹ پولیسنگ کے مثبت نتائج سامنے آرہے ہیں ، وزیر اعلیٰ پنجاب مریم نواز
