(ویب ڈیسک):
بھارتی نجی ایئرلائن انڈیگو کے ایک مسافر طیارے کو پرواز بھرنے کے کچھ ہی دیر بعد لینڈنگ گیئر میں فنی خرابی کا سامنا کرنا پڑا، تاہم پائلٹ کی حاضر دماغی کے باعث طیارے کو پونے ایئرپورٹ پر بحفاظت اتار لیا گیا۔
ایوی ایشن ذرائع کے مطابق طیارے نے معمول کے مطابق اڑان بھری تھی کہ دورانِ پرواز کاک پٹ عملے کو لینڈنگ گیئر کے نظام میں تکنیکی خرابی کی نشاندہی ہوئی۔ مسافروں کی سلامتی کو مدنظر رکھتے ہوئے پائلٹ نے فوری طور پر ایئر ٹریفک کنٹرول (ATC) سے رابطہ کیا اور ہنگامی لینڈنگ کی اجازت طلب کی۔
اجازت ملنے پر پونے ایئرپورٹ پر ہنگامی انتظامات مکمل کیے گئے اور طیارے کو بحفاظت رن وے پر اتار لیا گیا۔ واقعے میں تمام مسافر اور عملے کے ارکان محفوظ رہے۔
ایئرلائن انتظامیہ کے مطابق طیارے کو معائنے کے لیے گراؤنڈ کر دیا گیا ہے اور انجینئرنگ ٹیم فنی خرابی کی وجوہات کا جائزہ لے رہی ہے، جبکہ متاثرہ مسافروں کے لیے متبادل پرواز کا انتظام کیا جا رہا ہے