سیالکوٹ (بیورو رپورٹ۔سلیم احمد اعوان شیخو)
وزیراعلیٰ پنجاب مریم نواز شریف کے "محفوظ پنجاب ویژن” اور انسپکٹر جنرل آف پولیس پنجاب عبدالکریم راؤ کی ہدایات کی روشنی میں، ڈسٹرکٹ پولیس آفیسر (ڈی پی او) سیالکوٹ کیپٹن (ر) دوست محمد کی قیادت میں سیالکوٹ پولیس شہریوں کے جان و مال کے تحفظ اور جدید ٹیکنالوجی کے مؤثر استعمال کے ذریعے دن رات سرگرمِ عمل ہے۔سیالکوٹ پولیس کی انفارمیشن ٹیکنالوجی ٹیم نے جدید ٹیکنالوجی اور ای گیجٹ (E-Gadget) موبائل ایپلی کیشن کی مدد سے ماہِ اکتوبر کے دوران شہریوں کے چوری شدہ اور گمشدہ 91 قیمتی موبائل فونز ٹریس کرکے برآمد کر لیے ہیں، جن کی مجموعی مالیت 40 لاکھ 95 ہزار روپے بنتی ہے۔اس سلسلے میں ڈی پی او آفس سیالکوٹ میں ایک خصوصی تقریب کا انعقاد کیا گیا، جس میں ڈسٹرکٹ پولیس آفیسر کیپٹن (ر) دوست محمد نے برآمد شدہ موبائل فونز خود ان کے اصل مالکان کے حوالے کیے۔ اپنے گمشدہ و چوری شدہ قیمتی فونز واپس ملنے پر شہریوں کے چہروں پر خوشی دیدنی تھی۔ شہریوں نے سیالکوٹ پولیس کی آئی ٹی ٹیم کی پیشہ ورانہ مہارت، محنت اور مؤثر کاوشوں کو سراہتے ہوئے ڈی پی او سیالکوٹ اور پولیس ٹیم کا تہِ دل سے شکریہ ادا کیا۔سال 2026ء کی مجموعی کارکردگی: سال 2026ء کے دوران سیالکوٹ پولیس کی موبائل فون ریکوری کی کارکردگی انتہائی شاندار رہی ہے۔ یکم جنوری سے 12 نومبر 2026ء تک سیالکوٹ پولیس کی آئی ٹی ٹیم نے جدید ٹیکنالوجی کی مدد سے مجموعی طور پر 931 چوری شدہ و گمشدہ موبائل فونز برآمد کیے ہیں، جن کی مجموعی مالیت 4 کروڑ 18 لاکھ 95 ہزار روپے ہے۔اس موقع پر میڈیا سے گفتگو کرتے ہوئے ڈسٹرکٹ پولیس آفیسر سیالکوٹ کیپٹن (ر) دوست محمد نے کہا کہ جدید ٹیکنالوجی کا مؤثر استعمال پولیسنگ کو مزید فعال، تیز رفتار اور عوام دوست بنانے میں کلیدی کردار ادا کر رہا ہے۔ شہریوں کی قیمتی املاک کی بازیابی اور انہیں اصل مالکان تک پہنچانا ہماری اولین ترجیحات میں شامل ہے۔انہوں نے مزید کہا، "شہریوں کے چہروں پر واپس آنے والی خوشی ہی ہماری محنت کا اصل صلہ ہے۔ سیالکوٹ پولیس جدید ٹیکنالوجی اور پیشہ ورانہ صلاحیتوں کو بروئے کار لاتے ہوئے شہریوں کے جان و مال کے تحفظ کے لیے تمام دستیاب وسائل استعمال کر رہی ہے۔”ڈی پی او سیالکوٹ نے انفارمیشن ٹیکنالوجی ٹیم کی بہترین کارکردگی کو سراہتے ہوئے ہدایت کی کہ گمشدہ و چوری شدہ موبائل فونز کی ٹریسنگ اور ریکوری کے عمل کو مزید تیز اور مؤثر بنایا جائے تاکہ زیادہ سے زیادہ شہریوں کو ریلیف فراہم کیا جا سکے۔