خوشاب (راجہ نورالٰہی عاطف سے)
ضلع خوشاب کے علاقے قائدآباد میں الشیخ میانہ ہارس مین شپ کلب کے زیر اہتمام دو روزہ شاندار جشنِ میانہ چیمپئن شپ 4 اور 5 دسمبر کو منعقد ہوگی۔ اس منفرد گھڑ سواری کے مقابلے میں صرف مدعو کردہ ٹیمیں شرکت کریں گی، جبکہ معروف شخصیت نمبردار ملک اسد اقبال بگھور بطور مہمان سوار اس چیمپئن شپ کا حصہ ہوں گے۔ واضح رہے کہ نمبردار ملک اسد اقبال بگھور ، ضلع خوشاب کی نامور سماجی شخصیت نمبردار ملک شیر بہادر بگھور مرحوم کے صاحبزادے، معروف سوشل ورکر ملک امان اللہ بگھور اور سینیئر آفیسر نادرا ملک فرحت عباس بگھور کے بھائی ہیں ۔ یاد رہے کہ ضلع خوشاب میں نیزہ بازی اور گھڑ سواری کے فروغ کے لیے نمبردار ملک شیر بہادر بگھور نے مثالی کردار ادا کیا اور وہ اپنے دور میں علاقہ میں صحت مند سرگرمیوں کی ترویج کے لیے بہت نامور تھے اور نہایت ہی عزت و احترام کی نظر سے دیکھے جاتے تھے ۔
اس شاندار ایونٹ میں گھڑ سواری کے روایتی فن، مہارت، رفتار اور خوبصورت انداز کا مظاہرہ کیا جائے گا۔ چیمپئن شپ کے انعقاد کا مقصد گھڑ سواری کے قدیم ثقافتی ورثے کو فروغ دینا، اس خوبصورت کھیل سے وابستہ روایات کو زندہ رکھنا اور نوجوان نسل میں گھڑ سواری کے شوق کو پروان چڑھانا ہے۔
دو روزہ اس ایونٹ کے انعقاد سے قائدآباد اور ضلع خوشاب میں گھڑ سواری کے شائقین کو ایک دلچسپ اور یادگار کھیلوں کی سرگرمی دیکھنے کا موقع ملے گا۔ عوامی، سماجی، ادبی، ثقافتی اور کھیلوں کے حلقوں نے اس شاندار ایونٹ کے انعقاد کو خوش آئند قرار دیتے ہوئے منتظمین کی کاوشوں کو سراہا ہے۔