کیلے فورنیا:مائیکروسافٹ کی آؤٹ لک ٹیمز اور کو پائلٹ سمیت مائیکرو سافٹ کی متعدد سروسز میں خلل کے بعد کمپنی کی جانب سے کہا گیا ہے کہ وہ عالمی بندش کے اثرات کو محدود کرنے کے لیے تمام ممکنہ طریقے تلاش کرنے کے لیے مسلسل کوشاں ہے۔
یاد رہے کہ جمعے کے روز دن کے آغاز سے لے کر اب تک لگ بھگ پانچ گھنٹے سے زائد مائیکرو سافٹ سروسز پاکستان سمیت دنیا کے متعدد ممالک میں متاثر ہیں۔
ٹیکنالوجی کمپنی نے ایکس پر اعلان کیا ہے کہ اس کا بنیادی ڈھانچہ اس وقت بڑھتے ہوئے دباؤ کے زیر اثر ہے۔
مائیکروسافٹ کا کہنا ہے کہ وہ اپنی ایپز کی عالمی سطح پر ہونے والی بندش کو حل کرنے کے لیے تیزی سے کام کر رہا ہے۔ایکس پر اپنی تازہ ترین اپ ڈیٹ می انھوں نے کہا کہ اس کی ٹیم متاثرہ سسٹمز کو دوبارہ شروع کرنے کی کوششوں میں مثبِت نتائج دیکھ رہی ہے اور ان کی کارکردگی کا فعال طور پر جائزہ لے رہی ہے۔
کمپنی نے اس سے پہلے کہا تھا کہ کچھ سروسز زیادہ ٹریفک آنے پر دوبارہ غیر فعال ہو سکتی ہیں اور وہ یہ چیک کر رہی ہے کہ اس مسئلے کی وجہ کیا ہے۔
مائیکروسافٹ نے بتایا کہ وہ اس بگ کو ٹھیک کرنے کے لیے اب بھی کام کر رہا ہے۔
کمپنی کے مطابق اس کی کچھ سروسز مختصر طور پر دوبارہ بحالی کے بعد دوبارہ کام کرنا بند کر سکتی ہیں۔الیکٹرانک سروسز کی بندش کی نگرانی کرنے والی ویب سائٹ ڈاؤن ڈیٹیکٹر (DownDetector) کے مطابق جمعرات کی شام تقریباً 18:00 جی ایم ٹی پر آؤٹ لک سروس کے مسائل سے متعلق عالمی سطح پر موصول ہونے والی رپورٹس کی تعداد 138058 تک پہنچ گئی تھی۔
اگرچہ یہ مسئلہ ابتدائی طور پر امریکہ میں رپورٹ کیا گیا تھا تاہم مائیکروسافٹ کا کہنا ہے کہ کنیکٹیویٹی کے یہ مسائل دنیا کے کسی بھی خطے میں صارفین کو متاثر کر سکتے ہیں۔
مائیکروسافٹ نے وضاحت کی کہ اس کی تحقیقات سے یہ بات سامنے آئی ہے کہ انفرسٹرکچر پر بڑھتا ہوا دباؤ ڈیٹا ٹریفک میں اضافے کی وجہ سے نہیں بلکہ بہت سے سرورز کے غیر متوقع طور پر کام بند کر دینے کی وجہ سے ہے۔
بیان میں مزید کہا گیا کہ ہماری تحقیقات سے یہ سامنے آیا کہ متاثرہ سرورز پر ایک بنیادی عمل بہت زیادہ دباؤ میں ہے جو سرورز کے جواب دینا بند کرنے اور سروس کی صلاحیت میں کمی کا سبب بن رہا ہے۔
مائیکروسافٹ کے ایک اعلیٰ عہدیدار چارلس لامانا کا کہنا ہے کہ دنیا بھر میں سروسز میں تعطل کسی سائبر سکیورٹی واقعے کے باعث نہیں ہوا۔
اپنے بیان میں انھوں نے کہا کہ اس واقعے میں کسی بدنیتی پر مبنی سرگرمی یا ہیکنگ کا کوئی عمل دخل نہیں تھا۔
چارلس لامانا نے سوشل میڈیا پلیٹ فارم ایکس پر ایک بیان میں کہا کہ ہمیں افسوس ہے کہ آج سروسز میں تعطل کے باعث ہمارے صارفین کو مشکلات کا سامنا کرنا پڑا۔ ہم اس مسئلے کو حل کرنے کے لیے کام کر رہے ہیں۔
یاد رہے کہ جمعے کے روز پاکستان سمیت دنیا کے بیشتر ممالک میں مائیکروسافٹ کی آؤٹ لک ٹیمز اور کوپائلٹ سمیت متعدد سروسز میں خلل پانے کی خبریں سامنے آئیں۔
اس معاملہ پر تشویش کا اظہار کرتے ہوئے کمپنی کی جانب سے کہا گیا ہے کہ وہ عالمی بندش کے اثرات کو محدود کرنے کے لیے تمام ممکنہ طریقے تلاش کرنے کے لیے مسلسل کوشاں ہے تاہم انھیں اس میں توقع سے زیادہ وقت لگ رہا ہے۔
