کلر کہار:(منور حسین سے)
بوچھال کلاں میں ڈگری کالج کے قریب دو تیز رفتار موٹر سائیکل آپس میں ٹکرا گئے، جس کے نتیجے میں تین افراد زخمی ہو گئے۔ ریسکیو 1122 کی ٹیموں نے فوری طور پر جائے حادثہ پر پہنچ کر زخمیوں کو ابتدائی طبی امداد فراہم کی اور بعد ازاں ٹراما سینٹر کلر کہار منتقل کر دیا۔ریسکیو 1122 چکوال کے کمانڈ اینڈ کنٹرول روم کو حادثے کی اطلاع ملتے ہی کلر کہار سب اسٹیشن اور بوچھال کلاں کے قریبی کی پوائنٹ سے دو ایمبولینسز روانہ کی گئیں۔ ریسکیو اہلکاروں نے موقع پر پہنچ کر زخمیوں کا طبی معائنہ کیا اور ضروری امداد فراہم کی۔حادثے میں بوچھال کلاں کے رہائشی 23 سالہ توسیر عباس ولد ریاست کے سر پر چوٹ آئی، جبکہ بھال کے رہائشی بلال احمد ولد مرید حسین کی بائیں ٹانگ کی دونوں ہڈیوں، ٹیبیا اور فبیولا، میں فریکچر ہوا۔ ان کے دائیں ہاتھ اور چہرے پر بھی خراشیں آئیں۔ تیسرے زخمی 17 سالہ ہادی ولد اسد علی، سکنہ بھال، کی بائیں ٹانگ بھی فریکچر ہو گئی۔ریسکیو اہلکاروں نے تینوں زخمیوں کو ابتدائی طبی امداد دینے کے بعد مزید علاج کے لیے ٹراما سینٹر کلر کہار منتقل کر دیا۔