لاہور: نیشنل سائبر کرائم انویسٹیگیشن ایجنسی (NCCIA) لاہور نے سائبر فراڈ کے خلاف ایک بڑی اور کامیاب کارروائی کرتے ہوئے جوہر ٹاؤن میں قائم غیر قانونی کال سینٹر پر چھاپا مار کر 37 ملزمان کو گرفتار کر لیا ہے۔ گرفتار ملزمان منظم سائبر نیٹ ورک کے ذریعے امریکی شہریوں کو مالیاتی فراڈ کا نشانہ بنا رہے تھے۔
ایجنسی کے مطابق، ملزمان امریکی موبائل سروس فراہم کرنے والی کمپنیوں کے نمائندے بن کر امریکی شہریوں سے رابطہ کرتے تھے۔ وہ رعایت پر موبائل فونز فراہم کرنے کا جھانسہ دے کر سادلوح شہریوں سے ان کے کریڈٹ اور ڈیبٹ کارڈز کی خفیہ تفصیلات حاصل کرتے تھے، جس کے بعد ان کے اکاؤنٹس سے غیر قانونی مالیاتی ٹرانزیکشنز کر لی جاتی تھیں۔
این سی سی آئی اے کی رپورٹ کے مطابق ملزمان کے قبضے سےچھاپے کے دوران پولیس اورNCCIA کی ٹیم نے 35 موبائل فونز، 40 لیپ ٹاپس اور 5 سی پی یو (CPUs) برآمد کر لیے ہیں۔جبکہ بزآمد شدہ ڈیجیٹل ڈیوائسز کا ابتدائی معائنہ کرنے پر ایسا سافٹ ویئر اور ڈیٹا ملا ہے جو اس بین الاقوامی فراڈ نیٹ ورک میں استعمال ہو رہا تھا۔
ملزمان کے خلاف پیکا 2016 (PECA)اور تعزیراتِ پاکستان (PPC) کی متعلقہ دفعات کے تحت مقدمہ (FIR) درج کر لیا گیا ہے جبکہ مزید تفتیش جاری ہے۔
امریکی شہریوں کو لوٹنے والے غیر قانونی کال سینٹر پر بڑا کریک ڈاؤن: NCCIA لاہور کی جوہر ٹاؤن میں کارروائی، 37 ملزمان گرفتار
