باکسنگ کی تاریخ کا سب سے بڑا مقابلہ: "ٹائیسن فیوری بمقابلہ انتھونی جوشوا ” ٹکٹ ایک گھنٹے میں فروخت

کارڈف :شائقین کا انوکھا جوش ،برطانوی میڈیا کے مطابق، باکسنگ کی دنیا کے دو بڑے ناموں، ٹائیسن فیوری اور انتھونی جوشوا کے درمیان طویل عرصے سے متوقع تاریخی ہیوی ویٹ مقابلے کے تمام ٹکٹ فروخت کے لیے پیش کیے جانے کے محض ایک گھنٹے کے اندر ہی بک گئے۔
یہ یادگار مقابلہ کارڈف کے مشہور پرنسپلٹی اسٹیڈیم میں منعقد ہوگا۔برطانوی باکسنگ کی تاریخ کے اس سب سے بڑے مقابلے کو لے کر شائقینِ باکسنگ میں ناقابل یقین جوش و خروش پایا جا رہا ہے۔ برطانوی نشریاتی ادارے ’بی بی سی‘ کی رپورٹ کے مطابق، جمعے کے روز دوپہر 12 بجے تقریباً 80 ہزار ٹکٹ آن لائن فروخت کے لیے پیش کیے گئے تھے۔ ان ٹکٹوں کی قیمتیں (بکنگ فیس سمیت) 88.50 برطانوی پاؤنڈ (تقریباً 117 امریکی ڈالر) سے شروع ہو کر 13,128 پاؤنڈ (17,357 ڈالر) تک تھیں۔
ٹکٹوں کی فروخت شروع ہونے کے چند ہی لمحوں کے اندر پانچ لاکھ سے زائد مداح آن لائن قطار میں لگ گئے، جس سے اس فائٹ کی مقبولیت کا اندازہ لگایا جا سکتا ہے۔
اگرچہ باضابطہ مقابلے کا آغاز 11 دسمبر کو ہوگا، تاہم دونوں مایہ ناز باکسرز کی رنگ میں باضابطہ آمد 12 دسمبر کی شب تقریباً ایک بجے متوقع ہے۔
کارڈف سٹی کونسل میں جمع کرائی گئی سرکاری درخواست کے مطابق، پرنسپلٹی اسٹیڈیم اس رات مداحوں کے لیے صبح ساڑھے تین بجے تک کھلا رہے گا۔
سابق عالمی چیمپئنز کے درمیان ہونے والا یہ معرکہ مشہور اسٹریمنگ پلیٹ فارم نیٹ فلکس (Netflix) پر براہ راست نشر کیا جائے گا۔دلچسپ بات یہ ہے کہ سعودی عرب کے معروف سرمایہ کار ترکی آل الشیخ نے ابتدائی طور پر اس تاریخی مقابلے کو نیویارک کے تاریخی ’میڈیسن اسکوائر گارڈن‘ میں کرانے کی خواہش ظاہر کی تھی، تاہم اب یہ برطانیہ ہی میں ہو رہا ہے۔
یہ پہلا موقع ہوگا جب سابق عالمی ہیوی ویٹ چیمپئنز براہ راست ایک دوسرے کے آمنے سامنے ہوں گے، جس کے ساتھ ہی ان طویل مدتی قیاس آرائیوں کا بھی خاتمہ ہو گیا ہے جن کے تحت یہ خدشہ ظاہر کیا جا رہا تھا کہ شاید یہ دونوں مدمقابل کبھی رنگ میں ایک ساتھ نہیں آ سکیں گے۔