سکھر (رپورٹ: عبد الرحمان راجپوت)
ریجنل ڈائریکٹر صوبائی محتسب اعلیٰ سندھ (سکھر ڈویژن) احمد علی قریشی نے کہا ہے کہ حکومتِ سندھ کی جانب سے شہید بینظیر بھٹو ٹراما سینٹر سکھر کا قیام عوام کے لیے ایک عظیم تحفہ ہے۔ اس سینٹر کے ذریعے سکھر، گھوٹکی، خیرپور، شکارپور اور گردونواح کے دیگر اضلاع میں پیش آنے والے سنگین حادثات کے زخمیوں کو فوری طبی امداد فراہم کر کے قیمتی انسانی جانیں بچائی جا رہی ہیں۔ان خیالات کا اظہار انہوں نے شہید بینظیر بھٹو ٹراما سینٹر سکھر کے تفصیلی دورے کے موقع پر کیا۔ دورے کے دوران ریجنل ڈائریکٹر نے سینٹر کی لیبارٹری، میڈیسن اسٹور، استقبالیہ ڈیسک، فرسٹ ایڈ روم، الٹراساؤنڈ روم، ایکسرے روم، آپریشن تھیٹر اور مختلف وارڈز کا معاینہ کیا۔ اس موقع پر انہوں نے زیرِ علاج مریضوں سے ملاقات کر کے علاج معالجے اور دستیاب سہولیات کی کیفیت دریافت کی اور بہترین سہولیات کی فراہمی پر سینٹر کی انتظامیہ، ڈاکٹروں اور پیرا میڈیکل اسٹاف کو خراجِ تحسین پیش کیا۔اس موقع پر ٹراما سینٹر کے ایڈمنسٹریٹر ڈاکٹر محمود قریشی اور ڈائریکٹر ڈاکٹر ذوالفقار سومرو نے بریفنگ دیتے ہوئے بتایا کہ 50 بستروں پر مشتمل یہ ٹراما سینٹر جولائی 2026ء میں قائم کیا گیا ہے۔ سینٹر میں حادثات کے زخمیوں کو ایکسرے، الٹراساؤنڈ، لیبارٹری ٹیسٹ، آپریشن، ریڈیالوجی، سی ٹی اسکین اور وینٹی لیٹر سمیت تمام ضروری طبی سہولیات بلا معاوضہ فراہم کی جاتی ہیں، جن پر نجی اسپتالوں میں مریضوں کو بھاری اخراجات برداشت کرنا پڑتے ہیں۔ انہوں نے بتایا کہ سینٹر کو صوبائی وزیر صحت ڈاکٹر عذرا فضل پیچوہو کی سرپرستی حاصل ہے اور انتظامیہ کی اولین ترجیح بروقت امداد کے ذریعے جانیں بچانا ہے۔ڈاکٹر محمود قریشی نے عوام کی آگاہی کے لیے اپنے پیغام میں واضح کیا کہ ٹراما سینٹر کا بنیادی مقصد سنگین حادثات کے زخمیوں کو فوری طبی امداد فراہم کر کے ان کی حالت مستحکم کرنا ہے۔ مریض کی حالت خطرے سے باہر ہونے کے بعد مزید علاج کے لیے اسے سول اسپتال منتقل کیا جاتا ہے، لہٰذا شہری ابتدائی طبی امداد کے بعد مکمل علاج کے لیے سول اسپتال منتقل ہونے میں انتظامیہ سے تعاون کریں۔دورے کے دوران ریجنل ڈائریکٹر احمد علی قریشی نے سینٹر میں منعقدہ آگاہی سیمینار میں بھی شرکت کی۔ اس موقع پر محتسب آفس کے اسسٹنٹ سید خضر عباس، سینئر ڈاکٹرز اور پیرا میڈیکل اسٹاف کی بڑی تعداد موجود تھی اور انہوں نے مریضوں کی بہتری کے لیے جاری اقدامات کو سراہا۔