زمین پر سورج طلوع ہونے کا دلکش منظر تو آپ نے دیکھا ہو گا یا کم از کم تصاویر میں ضرور ملاحظہ کیا ہو گا، لیکن کیا آپ نے کبھی سوچا ہے کہ مریخ پر طلوعِ آفتاب کا نظارہ کیسا دکھائی دیتا ہے؟امریکی خلائی ادارے (ناسا) کے روور کیوروسٹی نے مریخ پر سورج طلوع ہونے کے بعد ایک انتہائی دنگ کر دینے والے منظر کی تصویر شیئر کی ہے۔ اس تصویر میں مریخ پر اربوں سال قبل بننے والی چٹانوں کو سورج کی ابتدائی شعاعوں میں نہاتے ہوئے دکھایا گیا ہے۔یہ تصویر کیوروسٹی نے مریخ کی سطح پر اپنے سفر کے دوران کیمرے میں محفوظ کی۔ یہ منظر سورج طلوع ہونے کے ٹھیک ایک گھنٹے بعد کا ہے، جس میں فاصلے پر موجود پہاڑیاں بھی واضح دکھائی دے رہی ہیں۔ناسا کے مطابق، یہ خطہ ممکنہ طور پر لگ بھگ 3 ارب سال قبل وجود میں آیا تھا۔خیال رہے کہ کیوروسٹی روور 2012 میں مریخ کے خطِ استوا کے قریب اترا تھا اور 2014 سے 3 میل بلند ماؤنٹ شارپ پر پیش قدمی کر رہا ہے۔ ماؤنٹ شارپ مختلف تہوں پر مشتمل ہے اور اس کی ہر تہہ اس سیارے کے جغرافیائی ماضی کی عکاسی کرتی ہے۔ ان تہوں کی تحقیق سے سائنسدانوں کو زمانہ قدیم میں اس خطے میں موجود جھیلوں اور چشموں کے بارے میں اہم شواہد حاصل ہوئے ہیں۔
3 ارب سال پرانی چٹانیں اور طلوعِ آفتاب: مریخ سے ناسا کی نئی دلکش تصویر سامنے آ گئی
