اسلام آباد :وفاقی دارالحکومت اسلام آباد کے سیکٹر ایف ایٹ میں نواب شہزادہ بہاول عباس خان عباسی کے گھر سے ملازم نے مبینہ طور پر 2 کروڑ روپے مالیت کے قیمتی نوادرات چوری کرلیے، پولیس نے کارروائی کرتے ہوئے 6 ملزمان کو گرفتار کرلیا۔
پولیس کے مطابق چوری کیے گئے نوادرات میں چاندی کی تخت نما کرسی، چاندی کی سیڑھیاں، چاندی کے پیالے، سونے کی پلیٹیں، نایاب مجسمے، ریاست بہاولپور کے شاہی نشان والی سونے کی اشیا اور چاندی کا تاریخی فریم شامل ہیں۔ گھر سے تاریخی نوعیت کی پرانی بندوقیں اور تلواریں بھی چوری کیے جانے کی اطلاعات ہیں۔
پولیس کے مطابق واردات سیکٹر ایف ایٹ میں ہوئی۔ واقعے کا مقدمہ نواب آف بہاولپور کی مدعیت میں تھانہ مارگلہ میں درج کیا گیا ہے۔ مقدمہ تعزیرات پاکستان کی دفعات 380 اور 454 کے تحت درج کیا گیا۔
مارگلہ تھانے کے انچارج محمد عمران کے مطابق چوری میں ملوث مرکزی گھریلو ملازم کو گرفتار کرکے اس سے تفتیش شروع کردی گئی ہے۔ تاہم پولیس نے تاحال یہ واضح نہیں کیا کہ چوری ہونے والا تمام سامان برآمد کرلیا گیا ہے یا نہیں۔
دوسری جانب ایس ایس پی آپریشنز قاضی علی رضا کے مطابق پولیس نے کارروائی کرتے ہوئے 6 ملزمان کو گرفتار کیا ہے اور ان سے 70 سے 80 فیصد مالِ مسروقہ برآمد کرلیا گیا ہے۔ مزید برآمدگی اور دیگر ملزمان کی گرفتاری کے لیے تفتیش کا دائرہ وسیع کردیا گیا ہے۔
واضح رہے کہ اسلام آباد میں حالیہ دنوں کے دوران چوری اور ڈکیتی کی وارداتوں میں اضافہ دیکھنے میں آیا ہے۔ رواں ہفتے پیش آنے والے 8 مختلف واقعات میں نقدی، قیمتی اشیا اور تاریخی ورثے سمیت 3 کروڑ 40 لاکھ روپے سے زائد مالیت کا سامان چوری ہونے کی اطلاعات ہیں۔
