محکمہ صحت بلوچستان نے دوہری ملازمت میں ملوث کنٹریکچوئل افسران و ملازمین پر ریکوری و جرمانہ عائد کرتے ہوئے حتمی نوٹس جاری کر دیا،
بلوچستان (بیورو چیف رحمت اللہ بلوچ سے)
محکمہ صحت، حکومتِ بلوچستان کی جانب سے دوہری ملازمت (Dual Employment) کے کیسز میں ملوث قرار دیے گئے کنٹریکچوئل افسران اور ملازمین کے حوالے سے حتمی نوٹس جاری کر دیا گیا ہے۔
تحقیقاتی کمیٹی کی سفارشات کی روشنی میں متعلقہ افسران و ملازمین پر مقررہ ریکوری اور جرمانہ عائد کیا گیا ہے۔ نوٹس کے مطابق متعلقہ افراد کو ہدایت کی گئی ہے کہ وہ مقررہ رقم فوری طور پر سرکاری خزانے میں جمع کروائیں اور رقم جمع کرانے کی رسید محکمہ صحت کے متعلقہ شعبے میں جمع کروائیں۔
نوٹس میں مزید واضح کیا گیا ہے کہ مقررہ مدت کے اندر رقم جمع نہ کروانے کی صورت میں معاملہ اینٹی کرپشن اسٹیبلشمنٹ بلوچستان کو بھجوایا جائے گا، جہاں سرکاری واجبات کی وصولی اور سخت قانونی کارروائی عمل میں لائی جائے گی۔