سعودی شہروں پر میزائل ڈرون حملے، شہزادہ محمد بن سلمان نے انصار اللہ کے خلاف اسرائیل سے مدد مانگ لی

ریاض: سعودی عرب کے متعدد علاقوں پر یمن کی انصار اللہ تحریک (حوثی باغیوں) کی جانب سے میزائل اور ڈرون حملوں کے بعد جدہ، ینبع، طائف، ابہا، جازان اور العلا سمیت کئی اہم شہروں میں پیشگی وارننگ جاری کی گئی ہے اور سائرن بجا کر شہریوں کو محتاط رہنے کی ہدایات جاری کر دی گئی ہیں۔ ساتھ ہی اسرائیلی میڈیا نے دعویٰ کیا ہے کہ سعودی عرب نے انصار اللہ کے خلاف اسرائیل سے مدد مانگی ہے۔
سعودی سول ڈیفنس اور حکام نے شہریوں اور مقیم غیر ملکیوں سے اپیل کی ہے کہ وہ ممکنہ خطرے کی صورت میں محفوظ عمارتوں کے اندر رہیں، کھلی جگہوں، کھڑکیوں اور دروازوں سے دور رہیں اور صرف سرکاری ہدایات پر عمل کرتے ہوئے غیر مصدقہ اطلاعات یا ویڈیوز شیئر کرنے سے گریز کریں۔
سعودی اتحاد کے ترجمان میجر جنرل ترکی المالکی نے ایک بیان میں بتایا کہ انصار اللہ کی جانب سے خمیس مشیط، ابہا اور طائف میں شہری آبادی کو بیلسٹک میزائلوں اور ڈرونز سے نشانہ بنایا گیا۔ ان حملوں کے نتیجے میں 13 شہری معمولی سے درمیانے درجے تک زخمی ہوئے جبکہ سات مکانات اور دو گاڑیوں کو نقصان پہنچا۔
ترجمان نے کہا کہ ”حوثی ملیشیا کی جانب سے عام شہریوں اور عمارتوں کو دانستہ طور پر نشانہ بنانا ان کی انتہا پسندانہ سوچ کو ظاہر کرتا ہے، اور ہماری مشترکہ افواج مملکت کی خودمختاری اور شہریوں کے تحفظ کے لیے ان حملوں کا انتہائی ذمہ داری اور سختی سے جواب دیں گی۔“
اس سے قبل پچھلے ہفتے بھی حوثی حملوں میں خواتین اور بچوں سمیت ستر سے زائد افراد کے زخمی ہونے کی اطلاع دی گئی تھی، جبکہ ریاض اور مدینہ کے علاقوں میں ڈرون حملوں کے بعد سعودی عرب کو اپنی اہم ترین ایسٹ ویسٹ پائپ لائن عارضی طور پر بند کرنا پڑی تھی جس کی خلیجی اور اسلامی تنظیموں نے شدید مذمت کی ہے۔
دوسری جانب جنگی صورتِ حال میں شدت اور باب المندب کی سمندری گزرگاہ پر انصار اللہ کے بڑھتے ہوئے کنٹرول کے پیشِ نظر خلیجی خطے میں سفارتی تحرک انتہائی تیز ہو گیا ہے۔
اسرائیلی میڈیا نے علاقائی سفارت کاروں کے حوالے سے دعویٰ کیا ہے کہ سعودی ولی عہد شہزادہ محمد بن سلمان نے خلیجی ممالک اور مصر سے باضابطہ جبکہ امریکی سینٹ کام کے ذریعے اسرائیل سے بھی انٹیلی جنس اور دیگر دفاعی معاونت کی اپیل کی ہے تاکہ باب المندب کو بند ہونے سے روکا جا سکے۔
رپورٹس کے مطابق سعودی ولی عہد نے خبردار کیا ہے کہ اس گزرگاہ کی بندش سے عالمی معیشت اور خطے کو ایسٹ ویسٹ پائپ لائن پر منحصر ینبع کی تیل برآمدات رکنے کی صورت میں انتہائی شدید نقصان پہنچ سکتا ہے۔