ہائیبرڈ گاڑیوں کے شوقین افراد کیلئے بڑی خوشخبری، لمبے انتظار کے بعد سیلز ٹیکس میں کمی!

اسلام آباد:گاڑیوں کے خریداروں اور مقامی آٹو سیکٹر کے لیے ایک بڑی اور شاندار خبر سامنے آئی ہے جہاں حکومت نے 2000 (سی سی) تک کے انجن کی حامل مقامی طور پر تیار کردہ ہائبرڈ الیکٹرک گاڑیوں (HEVs) پر سیلز ٹیکس کی شرح میں نمایاں کمی کرتے ہوئے اسے 25 فیصد سے کم کر کے 18 فیصد کر دیا ہے۔
وزارتِ خزانہ کی جانب سے جاری کردہ ایس آر او 1525(1)/2026 کے مطابق، اس فیصلے کا اطلاق فوری طور پر کر دیا گیا ہے جس سے مقامی سطح پر ہائبرڈ گاڑیاں تیار کرنے والے اداروں اور صارفین کو ریلیف ملے گا۔ اس ترمیم کا مقصد ملک میں ماحول دوست اور جدید ٹیکنالوجی کی حامل گاڑیوں کی صنعت کو فروغ دینا اور آٹو سیکٹر میں تیزی لانا ہے۔
واضح رہے کہ اس سے قبل ہائبرڈ گاڑیوں پر سیلز ٹیکس بڑھا کر روایتی پٹرول و ڈیزل گاڑیوں کے مساوی 25 فیصد کر دیا گیا تھا، جس پر صنعت کاروں کی طرف سے تشویش کا اظہار کیا جا رہا تھا۔ حکومت کے اس تازہ اقدام سے اب مقامی سطح پر بننے والی 2000 سی سی تک کی ہائبرڈ گاڑیوں کی قیمتوں میں کمی کا امکان پیدا ہو گیا ہے، جو مہنگائی کے اس دور میں کار عشاق کے لیے ایک بڑی راحت ثابت ہوگی۔