چکوال: ( جلیل نقوی سے )
ڈائریکٹر جنرل پنجاب فوڈ اتھارٹی کی خصوصی ہدایات پر ضلع چکوال میں کمرشل واٹر فلٹریشن پلانٹس کے خلاف کارروائیاں جاری ہیں۔ ڈپٹی ڈائریکٹر آپریشنز چکوال مہتاب خان کی نگرانی میں مختلف واٹر فلٹریشن پلانٹس سے پانی کے نمونے حاصل کرکے لیبارٹری بھجوائے گئے۔ لیبارٹری تجزیے کے مطابق تین کمرشل واٹر فلٹریشن پلانٹس کے پانی کے نمونے غیر معیاری اور انسانی صحت کے لیے مضر قرار پائے، جس پر پنجاب فوڈ اتھارٹی نے فوری کارروائی کرتے ہوئے متعلقہ تینوں پلانٹس پر ایمرجنسی پروہیبیشن آرڈر () نافذ کر دیا۔ اس حکم کے تحت آئندہ احکامات تک ان پلانٹس کو پانی کی پیداوار اور فروخت سے روک دیا گیا ہے۔ ڈپٹی ڈائریکٹر آپریشنز مہتاب خان نے کہا کہ پنجاب فوڈ اتھارٹی عوام کو محفوظ، معیاری اور صحت بخش خوراک کے ساتھ صاف پینے کے پانی کی فراہمی کے لیے بھرپور اقدامات کر رہی ہے۔ انہوں نے واضح کیا کہ شہریوں کی صحت پر کسی قسم کا سمجھوتہ نہیں کیا جائے گا اور غیر معیاری یا مضر صحت خوراک و پانی فراہم کرنے والوں کے خلاف بلاامتیاز قانونی کارروائیاں آئندہ بھی جاری رہیں گی۔ انہوں نے واٹر فلٹریشن پلانٹس کے مالکان اور فوڈ بزنس آپریٹرز کو ہدایت کی کہ وہ فوڈ سیفٹی قوانین اور مقررہ معیار پر مکمل عمل درآمد یقینی بنائیں، بصورت دیگر قانون کے مطابق سخت کارروائی کی جائے گی۔