رپورٹ مجیب کھوسو
جیکب آباد کے علاقے میرانپور میں گزشتہ روز ایک شخص کی پولیس مقابلے میں ہلاکت کے واقعے پر اہم پیش رفت سامنے آئی ہے۔ ایس ایس پی جیکب آباد کیپٹن (ر) فیضان علی کی ہدایت پر واقعے کی شفاف اور غیرجانبدارانہ انکوائری کرائی گئی، جس میں مبینہ پولیس مقابلہ جعلی قرار دیا گیا۔انکوائری رپورٹ کی روشنی میں فریادی علی بخش کی مدعیت میں پانچ پولیس اہلکاروں کے خلاف مقدمہ درج کر لیا گیا ہے۔ مقدمے کے اندراج کے بعد ذمہ دار اہلکاروں کے خلاف قانونی کارروائی کا آغاز کر دیا گیا ہے۔ایس ایس پی جیکب آباد کے سخت احکامات پر ڈی ایس پی لیگل غلام احمد اعوان کی سربراہی میں ملزمان کی گرفتاری کے لیے جوائنٹ اسپیشل انویسٹی گیشن ٹیم () تشکیل دے دی گئی ہے۔ ٹیم کو ہدایت کی گئی ہے کہ مقدمے میں نامزد تمام ملزمان کو جلد از جلد گرفتار کرکے قانون کے کٹہرے میں پیش کیا جائے۔پولیس حکام کے مطابق کیس کی تفتیش مکمل شفافیت، غیرجانبداری اور میرٹ کی بنیاد پر کی جائے گی، جبکہ واقعے میں ملوث کسی بھی اہلکار کے ساتھ رعایت نہیں برتی جائے گی تاکہ قانون کی بالادستی اور انصاف کی فراہمی کو ہر صورت یقینی بنایا جا سکے۔