بھارتی ریاست مغربی بنگال میں انفورسمنٹ ڈائریکٹوریٹ نے چھاپا مارکرسابق سرکاری بس ڈرائیور کے رہائشی مقام سے کروڑوں روپے مالیت کا سیاہ دھن اور قیمتی سونا پکڑ لیا ہے۔ اتنی بڑی مقدار میں نقدی برآمد ہوئی کہ اسے گننے کے لیے لائی گئی 5 مشینیں بھی مسلسل کام کرنے کی وجہ سے خراب ہو گئیں۔
پولیس نے مصدقہ اطلاع پر رات کے وقت سابق بس ڈرائیور مینار منڈل کے گھر پر اچانک دھاوا بولا۔ ابتدائی تلاشی کے دوران ساڑھے پانچ کروڑ روپے اور 15 کلو سونا ہاتھ لگا، تاہم مزید گہرائی سے تلاشی لینے پر نقد رقم کا یہ پہاڑ بڑھ کر 28 کروڑ روپے تک جا پہنچا۔
میڈیا رپورٹس کے مطابق مرکزی ملزم مینار منڈل پتھروں کے نامور تاجر تُلو منڈل کا قریبی رشتہ دار بتایا جاتا ہے، جو خود ماضی میں حکمراں جماعت ترنمول کانگریس کے متنازع رہنما انوبرت منڈل کا قریبی ساتھی رہ چکا ہے۔ پولیس حراست میں ابتدائی تفتیش کے دوران ملزم نے اعتراف کیا ہے کہ یہ تمام دولت اور سونا تُلو منڈل کے غیر قانونی مالیاتی نیٹ ورک کی ملکیت ہے۔
مینار منڈل ریاست کے ٹرانسپورٹ محکمے میں ڈرائیور کے طور پر فرائض انجام دیتا تھا، لیکن بعد میں اس نے پتھروں کے کاروبار کا رُخ کیا۔
اس سنسنی خیز چھاپے اور بھاری بھرکم برآمدگی کے بعد مغربی بنگال کی سیاست میں طوفان برپا ہو گیا ہے۔ ترنمول کانگریس کے اندرونی حلقوں اور مخالف جماعتوں کے درمیان الزامات اور جوابی الزامات کا نہ ختم ہونے والا سلسلہ شروع ہو چکا ہے، جبکہ عوامی سطح پر تمام بااثر کرداروں کی شفاف تحقیقات کا مطالبہ زور پکڑ رہا ہے۔
دوسری جانب، سال 2024 میں تُلو منڈل کی دختر کی انتہائی شاہانہ اور پُرتکلف شادی بھی ایک بار پھر ذرائع ابلاغ کی زینت بن گئی ہے۔ بھارتی میڈیا کے مطابق اس عالیشان تقریب پر تقریباً 100 کروڑ روپے پانی کی طرح بہائے گئے تھے، جس میں فلمی دنیا کے ستاروں سمیت کئی نامور سیاسی و سماجی شخصیات نے شرکت کی تھی۔
سابق بس ڈرائیور کے گھر چھاپہ: 28 کروڑ روپے نقد اور 15 کلو سونا برآمد، نوٹ گننے والی 5 مشینیں بھی تھک گئیں!
