کراچی میں جعلی شناختی دستاویزات کا نیٹ ورک بے نقاب، نادرا افسران سمیت 4 ملزمان گرفتار

کراچی :وفاقی تحقیقاتی ادارے اور قانون نافذ کرنے والے اداروں نے مشترکہ انٹیلی جنس بنیادوں پر کارروائی کرتے ہوئے افغان شہریوں کے لیے جعلی شناختی دستاویزات تیار کرنے اور سرکاری ریکارڈ میں ردوبدل کرنے والے نیٹ ورک کے 4 ملزمان کو گرفتار کر لیا۔
ایف آئی اے کے مطابق گرفتار افراد میں نادرا کے ایک اسسٹنٹ ڈائریکٹر، ڈپٹی اسسٹنٹ ڈائریکٹر، چوکیدار اور ایک نجی ایجنٹ شامل ہیں۔
ابتدائی تحقیقات میں ملزمان پر افغان شہریوں کے لیے جعلی دستاویزات کے اجرا، ریکارڈ میں غیر قانونی تبدیلی اور سہولت کاری کے الزامات سامنے آئے ہیں۔ ایف آئی اے کا کہنا ہے کہ ابتدائی شواہد سے نیٹ ورک کے بعض دہشت گرد عناصر سے ممکنہ روابط کی بھی نشاندہی ہوئی ہے، تاہم اس حوالے سے مزید تحقیقات جاری ہیں۔
کارروائی کے دوران اہم ریکارڈ اور دیگر شواہد قبضے میں لے لیے گئے ہیں، جبکہ نیٹ ورک کے دیگر سہولت کاروں اور مرکزی کرداروں کی گرفتاری کے لیے تحقیقات کا دائرہ وسیع کر دیا گیا ہے۔
قومی شناختی نظام کا غلط استعمال صرف جعلسازی نہیں بلکہ قومی سلامتی کے لیے بھی سنگین خطرہ ہے۔ ذمہ دار عناصر کے خلاف بلاامتیاز کارروائی اور شفاف تحقیقات ناگزیر ہیں۔