لنڈے کی معمولی شرٹ تاریخی نکلی؛ نوجوان نے ایک ہی جھٹکے میں کروڑوں کما لیے

واشنگٹن: امریکا میں پرانے کپڑوں کی خرید و فروخت کرنے والے ایک نوجوان کی قسمت اس وقت راتوں رات چمک اٹھی جب اسے تھریفت اسٹور سے محض 3 ڈالر میں خریدی گئی ایک معمولی سی شرٹ کے بدلے ہزاروں ڈالرز مل گئے۔
اس نایاب شرٹ کی نیلامی سے نوجوان نے پاکستانی روپوں کے حساب سے تقریباً ڈھائی کروڑ روپے کما لیے ہیں۔
کوئن براؤن نامی یہ نوجوان پرانے کپڑوں کو آن لائن فروخت کرنے کا شوقین ہے۔ اس نے امریکی ریاست اوریگن کے ایک سیکنڈ ہینڈ (پرانے کپڑوں کے) اسٹور سے صرف تین ڈالر دے کر ایک شرٹ خریدی تھی۔ جب اس نے اس شرٹ کے بارے میں تحقیق کی تو اسے معلوم ہوا کہ یہ کوئی عام لباس نہیں، بلکہ امریکہ کے لیجنڈری باسکٹ بال اسٹار ولٹ چیمبرلین نے سال 1972 کے باسکٹ بال چیمپئن شپ فائنل میں زیب تن کی تھی۔
ماہرین نے اس کی ابتدائی تخمینہ قیمت ڈیڑھ لاکھ سے ڈھائی لاکھ ڈالر کے درمیان لگائی تھی۔ تاہم، حتمی بولیاں اس توقع سے کچھ کم آئیں اور سب سے زیادہ بولی لگانے والے خریدار نے یہ نایاب شرٹ 89 ہزار 600 ڈالرز میں خرید لی، جو پاکستانی کرنسی میں تقریبا ڈھائی کروڑ روپے بنتی ہے۔