مشرق وسطی میں امریکی ہلاکتوں کی تعداد 18، امریکا کے ایران پر تازہ فضائی حملے، اہم ایرانی کمانڈر اسماعیل مصری شہید

    واشنگٹن: اردن اور عراق میں ہونے والے حملوں میں امریکی فوجیوں کی ہلاکتوں کے بعد امریکی فوج نے اتوار کی شام ایران کے خلاف تازہ فضائی حملے شروع کر دیے ہیں۔

    امریکی سینٹرل کمانڈ (CENTCOM) کے مطابق، یہ کارروائی تین گھنٹے تک جاری رہی جو رات 10 بجے ختم ہوئی۔ اس دوران ایرانی فوجی کمانڈ سینٹرز، فضائی دفاع اور ساحلی نگرانی کے مقامات، میری ٹائم صلاحیتوں، میزائل و ڈرون لانچ سائٹس اور مواصلاتی نیٹ ورکس کو نشانہ بنایا گیا۔


    اس جاری تنازع کے نتیجے میں اب تک 18 امریکی فوجی ہلاک ہو چکے ہیں۔
    انٹیلی جنس ذرائع کے مطابق امریکی فوج نے تہران میں پاسداران انقلاب (IRGC) کے ہیڈ کوارٹر پر ایک براہ راست اور انتہائی اہم فضائی حملہ کیا ہے، جس کے نتیجے میں اسماعیل مصری مبینہ طور پر ہلاک ہو گئے ہیں۔


    رپورٹس کے مطابق اسماعیل مصری وہ شخص تھے جنہیں امریکہ میں خلیجی ممالک میں واقع اڈوں پر بمباری کا ذمہ دار ٹھہرایا جا رہا تھا، اس حملے میں 100 سے زائد افراد کی جانیں چلی گئی تھیں۔ انٹیلی جنس ذرائع کا کہنا ہے کہ اس تازہ کارروائی میں وہ موقع پر ہی ہلاک ہو گئے۔ اس حوالے سے مزید تفصیلات کا انتظار کیا جا رہا ہے۔


    جمعہ کے روز اردن کے موفق السطی ایئر بیس پر کم از کم دو ایرانی بیلسٹک میزائل گرے، جس کے نتیجے میں لاپتہ ہونے والے ایک امریکی فوجی کی باقیات تلاش کر لی گئیں جبکہ ایک اور فوجی زخمی ہوا۔ اس حملے میں مجموعی طور پر دو امریکی فوجی مارے گئے۔


    اتوار کے روز شمالی عراق میں گرائے گئے ایک ایرانی ڈرون کے بارودی مواد کو ناکارہ بناتے ہوئے ایک اور امریکی فوجی ہلاک ہو گیا۔
    امریکی صدر ڈونلڈ ٹرمپ نے نامہ نگاروں سے گفتگو کرتے ہوئے کہا کہ امریکہ نے اتوار کو ایک بار پھر ایران کو بہت سخت نقصان پہنچایا ہے۔ انہوں نے کہا، "ہمیں بہت دکھ ہے، لیکن آپ جانتے ہیں کہ وہ عظیم مححب وطن لوگ ایران کو جوہری ہتھیار حاصل کرنے سے روکنے کے لیے لڑ رہے تھے۔”
    صدر ٹرمپ نے مزید کہا کہ ایران کو عسکری طور پر شدید ترین نقصان پہنچایا گیا ہے اور اس کے پاس اب نہ ہونے کے برابر عسکری ساز و سامان بچا ہے۔

    Related Posts