کراچی ڈیسک:مشہور ٹیکنالوجی کمپنی ’سام سنگ‘ کے 22 جولائی کو شیڈول ’گلیکسی اَن پیکڈ‘ ایونٹ میں ابھی چند روز باقی ہیں، لیکن اس سے پہلے ہی معروف ٹیک لیکر ایون بلاس نے کمپنی کے آفیشل مارکیٹنگ میٹریل کی تصاویر جاری کر کے تمام سسپنس ختم کر دیا ہے۔ لیک ہونے والی ان معلومات نے سام سنگ کے نئے فولڈ ایبل فونز اور اسمارٹ واچ کی تکنیکی تفصیلات کو تقریباً حتمی شکل دے دی ہے۔
رپورٹس کے مطابق، ’سام سنگ گلیکسی زی فولڈ 8‘ لیونڈر رنگ میں متعارف کرایا جائے گا جس میں جدید ڈوئل رئیر کیمرہ سسٹم اور طاقتور پروسیسر شامل ہوگا۔ اس کے علاوہ، ’گلیکسی اے آئی‘ (Galaxy AI) کے نئے فیچرز صارفین کو مصنوعی ذہانت کے ذریعے پہلے سے زیادہ جدید تجربہ فراہم کریں گے۔ کیمرہ سیٹ اپ کی بات کی جائے تو زی فولڈ 8 میں 50 میگا پکسل کے دو کیمروں پر مشتمل سسٹم دیا گیا ہے۔
سام سنگ نے اپنے پچھلے ماڈلز پر ہونے والی تنقید کو مدنظر رکھتے ہوئے بیٹری لائف پر خصوصی توجہ دی ہے۔ لیکس کے مطابق، نیا فون ایک بار چارج کرنے پر 26 گھنٹے تک ویڈیو پلے بیک فراہم کرنے کی صلاحیت رکھتا ہے، جو صارفین کے لیے ایک بڑی پیش رفت ہے۔
ایونٹ میں ’سام سنگ گلیکسی واچ 9‘ بھی متعارف کرائی جا رہی ہے۔ اگرچہ اس کے ڈیزائن میں کوئی بڑی تبدیلی نظر نہیں آ رہی، تاہم اس میں ’سنیپ ڈریگن ویئر ایلیٹ‘ چپ نصب کی گئی ہے۔ اس سمارٹ واچ میں صحت اور فٹنس سے متعلق جدید فیچرز شامل کیے گئے ہیں جو نیند، دل کی دھڑکن اور روزمرہ کی ورزش کی نگرانی میں زیادہ درست معلومات فراہم کریں گے۔
ٹیکنالوجی ماہرین کا ماننا ہے کہ سام سنگ کے یہ نئے فولڈ ایبل فونز ایسے وقت میں آ رہے ہیں جب ایپل بھی اپنے پہلے فولڈ ایبل آئی فون پر کام کر رہا ہے۔ ایپل کے مبینہ فولڈ ایبل فون میں 7.8 انچ کی بڑی اسکرین اور 4700 ملی ایمپیئر کی بیٹری کی خبریں پہلے ہی گردش کر رہی ہیں۔ اب دیکھنا یہ ہے کہ 22 جولائی کی تقریب میں سام سنگ ان لیکس کے علاوہ صارفین کو کوئی اور سرپرائز دیتا ہے یا نہیں۔
سام سنگ کے نئے ماڈلز کی تفصیلات لیک،نئے فولڈ ایبل فونز اور واچ کے اہم راز فاش، کیا کچھ نیا ہے؟
