ٹانک (بیورو رپورٹ): ڈسٹرکٹ پریس کلب رجسٹرڈ ٹانک کے صدر سید بادشاہ کنڈی حاجی نور محمد برکی اور جنرل سیکرٹری حاجی کفایت اللہ پراچہ نے ڈپٹی کمشنر ٹانک جمشید خان سے ان کے دفتر میں ملاقات کی۔ ملاقات کے دوران ضلع ٹانک میں جاری ترقیاتی منصوبوں، نکاسی آب، صفائی ستھرائی، واپڈا سے متعلق عوامی مسائل اور دیگر فلاحی منصوبوں پر تفصیلی تبادلہ خیال کیا گیا۔ڈپٹی کمشنر جمشید خان نے اس موقع پر کہا کہ ٹانک کے عوام کو درپیش تمام مسائل ان کی ترجیحات میں شامل ہیں اور ضلعی انتظامیہ عوام کو بنیادی سہولیات کی فراہمی کے لیے دن رات کوشاں ہے۔ انہوں نے کہا کہ ترقیاتی منصوبوں میں شفافیت، معیار اور میرٹ کو ہر صورت یقینی بنایا جائے گا اور عوامی مفاد کے خلاف کسی قسم کی غفلت یا کوتاہی برداشت نہیں کی جائے گی انہوں نے بتایا کہ بابِ ٹانک، پبلک پارک، نکاسی آب کے بڑے نالوں کی تعمیر و بحالی، صفائی کے نظام کی بہتری اور دیگر ترقیاتی منصوبوں پر تیز رفتاری سے کام جاری ہے۔ ان منصوبوں کی تکمیل سے نہ صرف شہریوں کو بہتر سہولیات میسر آئیں گی بلکہ ٹانک کی خوبصورتی، صفائی اور شہری انفراسٹرکچر میں بھی نمایاں بہتری آئے گی۔ ڈپٹی کمشنر نے کہا کہ ان کا عزم ہے کہ ٹانک کو ایک صاف، خوبصورت، منظم اور ترقی یافتہ ضلع بنایا جائے، تاکہ عوام کو جدید شہری سہولیات ان کی دہلیز پر میسر آسکیں۔ انہوں نے کہا کہ ان شاء اللہ وہ دن دور نہیں جب ٹانک کا شمار صوبے کے بہترین اضلاع میں ہوگا اور شہر کا نقشہ یکسر تبدیل نظر آئے گا۔اس موقع پر ڈسٹرکٹ پریس کلب رجسٹرڈ ٹانک کے صدر سید بادشاہ کنڈی اور جنرل سیکرٹری حاجی کفایت اللہ پراچہ نے ڈپٹی کمشنر جمشید خان کی عوام دوست سوچ، بہتر انتظامی حکمت عملی اور ترقیاتی وژن کو سراہتے ہوئے کہا کہ ضلعی انتظامیہ کی سنجیدہ کاوشیں قابلِ تحسین ہیں۔ انہوں نے امید ظاہر کی کہ انتظامیہ، عوام اور میڈیا کے باہمی تعاون سے ٹانک ترقی، خوشحالی اور مثالی شہری سہولیات کی نئی منزلیں طے کرے گا
ٹانک کی ترقی اولین ترجیح، معیار پر کوئی سمجھوتہ نہیں ہوگا، ، ڈپٹی کمشنر
