سمندر میں لاپتہ نجی کارگو طیارے کی تلاش میں اہم پیشرفت؛ اوڑمارہ کے ساحل کے قریب ملبہ مل گیا

کراچی: نجی کمپنی کے لاپتہ ہونے والے کارگو طیارے کی تلاش کے سلسلے میں پاک بحریہ اور پاکستان میری ٹائم سیکیورٹی ایجنسی (PMSA) کو بڑی کامیابی حاصل ہوئی ہے۔

ترجمان پاک بحریہ کے مطابق، لاپتہ کارگو طیارے کی تلاش کے لیے 12 گھنٹے سے زائد وقت تک جاری رہنے والے مشترکہ سرچ آپریشن کے دوران طیارے کا ملبہ اوڑمارہ کے ساحل سے 53 ناٹیکل میل جنوب کی جانب تلاش کر لیا گیا ہے۔

خیال رہے کہ نجی کمپنی کا یہ طیارہ سمندر کے اوپر پرواز کے دوران اچانک لاپتہ ہو گیا تھا، جس کے بعد پاک بحریہ اور میری ٹائم سیکیورٹی ایجنسی نے ہنگامی بنیادوں پر سرچ مشن کا آغاز کیا تھا۔ ملبہ ملنے کے بعد اب ریسکیو آپریشن کو مزید تیز کر دیا گیا ہے۔

ترجمان نے مزید بتایا کہ طیارے کے عملے کے ارکان کی بازیابی اور واقعے کے مزید شواہد اکٹھا کرنے کے لیے سمندر میں ریسکیو آپریشن بدستور جاری ہے۔ اس مقصد کے لیے پاک بحریہ اور پی ایم ایس اے کے بحری اور فضائی اثاثے انتہائی مستعدی سے سرچ مشن میں مصروف عمل ہیں۔ حکام کا کہنا ہے کہ تمام تر وسائل بروئے کار لائے جا رہے ہیں تاکہ لاپتہ افراد کا سراغ لگایا جا سکے۔