سکھر ( رپورٹ / عبد الرحمان راجپوت)
گلیاں ٹوٹ پھوٹ کا شکار، اسٹریٹ لائٹس غائب، شہری مشکلات میں مبتلا اور کچرے کے ڈھیر ۔
سکھر نیو پنڈ بھوسہ لائن فاروق عباسی کے بھائی والی گلی یو سی 8، وارڈ نمبر 4 کے رہائشیوں نے چیئرمین رمضان عباسی اور کونسلر گل پٹھان کی کارکردگی پر تشویش کا اظہار کرتے ہوئے مطالبہ کیا ہے کہ علاقے کی خستہ حال گلیوں اور اسٹریٹ لائٹس کے مسائل پر فوری توجہ دی جائے۔ مقامی افراد کے مطابق متعدد گلیاں ٹوٹ پھوٹ کا شکار ہیں جبکہ کئی مقامات پر اسٹریٹ لائٹس نہ ہونے کے باعث رات کے اوقات میں شدید اندھیرا رہتا ہے، جس سے بچوں، بزرگوں اور خواتین کو آمد و رفت میں مشکلات کا سامنا کرنا پڑتا ہے۔اہلِ علاقہ کا کہنا ہے کہ اندھیرے اور ٹوٹی سڑکوں کی وجہ سے حادثات اور جانی و مالی نقصان کے خدشات بڑھ گئے ہیں۔ شہریوں نے شکایت کی ہے کہ بارہا توجہ دلانے کے باوجود بنیادی سہولیات کی فراہمی کے لیے مؤثر اقدامات نہیں کیے گئے۔شہریوں نے میئر سکھر، ڈپٹی میئر اور متعلقہ اعلیٰ حکام اور محکمہ بلدیات سے مطالبہ کیا ہے کہ منتخب نمائندوں کی کارکردگی اور ترقیاتی فنڈز کے استعمال کا شفاف حساب لیا جائے۔ یو سی 8، وارڈ 4 کی گلیوں کی فوری مرمت، نکاسیٔ آب کے مسائل کے حل اور نئی اسٹریٹ لائٹس کی تنصیب کے لیے ہنگامی بنیادوں پر اقدامات کیے جائیں تاکہ عوام کو درپیش مشکلات کا خاتمہ ہو سکے۔ سکھر میں بلدیاتی خدمات اور یونین کونسلوں کی ذمہ داری مقامی حکومت کے نظام کے تحت انجام دی جاتی ہے۔