میلسی( تحصیل رپورٹر سجاد سحر)
میلسی: شدید گرمی کی لہر اور ہیٹ ویو کے پیشِ نظر شہریوں کو ریلیف فراہم کرنے کے لیے وزیرِ اعلیٰ پنجاب محترمہ مریم نواز شریف کی خصوصی ہدایت پر تحصیل انتظامیہ میلسی، اور میونسپل کمیٹی میلسی کے اشتراک سے شہر کی مرکزی شاہراہ قائداعظم روڈ پر "ہیٹ ویو کیمپ” کے نام سے ٹھنڈے اور میٹھے پانی کی سبیل قائم کر دی گئیں۔اسسٹنٹ کمشنر میلسی کی زیرِ نگرانی لگائے گئے اس کیمپ میں راہگیروں، مسافروں اور مزدوروں کے لیے فری ٹھنڈا پانی اور میٹھا شربت فراہم کیا جا رہا ہے۔ کیمپ پر "پینے کیلئے ٹھنڈا پانی” نمایاں طور پر درج ہے۔ کیمپ عملہ موجودہے اسسٹنٹ کمشنر میلسی محمد سعد بن خالد کا کہنا ہے کہ گرمی کی شدت کے پیشِ نظر یہ فلاحی اقدام جاری رہے گا تاکہ شہری ہیٹ اسٹروک سے محفوظ رہیں۔ انہوں نےشہریوں سے اپیل کی کہ "دن کے وقت جب گرمی شدید ہو تو صرف مجبوری کی صورت میں ہی گھر سے نکلیں۔ اگر نکلنا ضروری ہو تو سر ڈھانپ کر نکلیں، ٹھنڈا پانی اور مشروبات کا استعمال زیادہ کریں۔ ہلکے رنگ کے ڈھیلے ڈھالے کپڑے پہنیں اور براہِ راست دھوپ سے بچیں۔ بچوں، بزرگوں اور حاملہ خواتین کا خاص خیال رکھیں۔” ہیٹ ویو سے بچاؤ کی تمام ہدایات کیمپ پر نمایاں فلیکس پر درج کر دی گئی ہیں تاکہ ہر آنے والا شخص ان پر عمل کر کے خود کو محفوظ رکھ سکے۔