بالی وڈ لیجنڈ گووندا کی اہلیہ سنیتا آہوجا کا جائیداد اپنے پالتو کتے کے نام کرنے کا اعلان،

ممبئی: بالی ووڈ کے مشہور اداکار گووندا کی اہلیہ سنیتا آہوجا کے ایک حالیہ بیان نے سوشل میڈیا اور میڈیا حلقوں میں نئی بحث چھیڑ دی ہے۔ سنیتا آہوجا نے ممبئی ایئرپورٹ پر گفتگو کے دوران مزاحیہ انداز میں کہا کہ وہ اپنی تمام تر جائیداد اپنے پالتو کتے کے نام کرنے کا ارادہ رکھتی ہیں۔
واقعہ اس وقت پیش آیا جب سنیتا آہوجا اپنے پالتو کتے کے ہمراہ ایئرپورٹ پر موجود تھیں اور میڈیا کے نمائندوں نے ان سے ان کی جائیداد کے بارے میں سوال کیا۔ سنیتا نے مسکراتے ہوئے کہا کہ ان کی پوری دولت کا اصل وارث ان کا پالتو کتا ہی ہوگا۔ ان کا یہ غیر متوقع اور مزاحیہ بیان وہاں موجود فوٹوگرافرز اور رپورٹرز کے لیے بھی حیران کن تھا، جبکہ سوشل میڈیا پر اس بیان کے بعد مختلف قیاس آرائیاں جنم لے رہی ہیں۔
سنیتا آہوجا کے اس بیان کے بعد ان کی گووندا کے ساتھ نجی زندگی اور ممکنہ علیحدگی سے متعلق پرانی چہ مگوئیاں ایک بار پھر گردش کرنے لگی ہیں۔ یاد رہے کہ گووندا اور سنیتا 1987 میں رشتہ ازدواج میں منسلک ہوئے تھے اور ان کے دو بچے، ٹینا اور یشوردھن ہیں۔ میڈیا میں اکثر ان دونوں کے درمیان اختلافات کی افواہیں آتی رہتی ہیں، جن کی تردید یہ جوڑا وقتاً فوقتاً کرتا رہا ہے۔
دوسری جانب، ایک خوشگوار خبر یہ ہے کہ سنیتا آہوجا کے اپنے بھتیجے کرشنا ابھیشیک کے ساتھ طویل عرصے سے جاری اختلافات میں کمی آ رہی ہے۔ تقریباً 14 سال تک جاری رہنے والی یہ خاندانی تلخی اب ختم ہوتی دکھائی دے رہی ہے، اور دونوں کے تعلقات میں بہتری کے واضح آثار دیکھے جا رہے ہیں۔