لندن: انگلش فٹ بال کی دنیا میں ایک نئے دور کا آغاز ہو گیا ہے۔ آرسنل فٹ بال کلب نے 22 برس کے طویل اور صبر آزما انتظار کے بعد دوبارہ انگلش پریمیئر لیگ کا چیمپئن بن کر تاریخ رقم کر دی ہے۔ یہ تاریخی لمحہ منگل کے روز اس وقت یقینی ہوا جب مانچسٹر سٹی اور بورن ماؤتھ کے درمیان میچ 1-1 سے برابر ہو گیا۔
آرسنل کے لیے یہ کامیابی اس وقت پکی ہوئی جب مانچسٹر سٹی، جو پوائنٹس ٹیبل پر دوسرے نمبر پر موجود تھا، بورن ماؤتھ کو شکست دینے میں ناکام رہا۔ اس ڈرا میچ کے نتیجے میں آرسنل کو پوائنٹس ٹیبل پر چار پوائنٹس کی فیصلہ کن برتری حاصل ہو گئی ہے، اور اب لیگ میں صرف ایک میچ باقی بچا ہے۔
اتوار کے روز کرسٹل پیلس کے خلاف آرسنل کا میچ اب مقابلے کے بجائے صرف ایک جشن کی حیثیت اختیار کر چکا ہے، کیونکہ آرسنل پہلے ہی چیمپئن بننے کا اعزاز حاصل کر چکا ہے۔ آرسنل نے پیر کے روز برنلے کو 0-1 سے ہرا کر ٹائٹل کی دوڑ میں اپنی پوزیشن پہلے ہی ناقابلِ شکست بنا لی تھی۔
آرسنل کے مینیجر مِکیل آرٹیٹا کے لیے یہ کامیابی ان کی سخت محنت اور مستقل مزاجی کا صلہ ہے۔ گزشتہ تین سیزن سے آرسنل کی ٹیم دوسرے نمبر پر آکر ٹائٹل سے محروم رہ جاتی تھی، لیکن آرٹیٹا نے ہمت نہ ہاری اور ٹیم کو چودہویں بار انگلش چیمپئن بنوا دیا۔
اس جیت کے ساتھ ہی 44 سالہ آرٹیٹا آرسنل کی تاریخ کے سب سے کم عمر مینیجر بن گئے ہیں جنہوں نے یہ اعزاز اپنے نام کیا ہے۔ یہ کامیابی کلب کی تاریخ کے اس سنہری دور کی یاد تازہ کرتی ہے جب 04-2003 کے سیزن میں آرسین وینگر کی قیادت میں ’دی گنرز‘ نے بغیر کوئی میچ ہارے لیگ جیتی تھی۔
دوسری جانب، یہ نتیجہ مانچسٹر سٹی کے لیے ایک بڑے دھچکے کی طرح آیا ہے۔ میچ کے پہلے ہاف میں ایلی جونیئر کروپی کے گول نے سٹی کو دباؤ میں ڈالا، اور اگرچہ ارلنگ ہالینڈ نے آخری لمحات میں گول کر کے مقابلہ برابر کیا، لیکن یہ جیت کے لیے کافی نہیں تھا۔اس ناکامی کے ساتھ ہی مانچسٹر سٹی کے مینیجر پیپ گارڈ یولا کے ایک دہائی پر محیط یادگار دور کا اختتام بھی قریب دکھائی دے رہا ہے۔ گارڈ یولا رواں سیزن کے اختتام پر کلب سے رخصت ہو رہے ہیں، اور ان کا دورۂ مانچسٹر ایک ایسے تلخ انجام پر ختم ہوا جس کا ان کے مداحوں کو ہرگز اندازہ نہیں تھا۔
آرسنل کی اس شاندار جیت نے پورے لندن میں جشن کا سماں پیدا کر دیا ہے اور شائقین اپنے ہیروز کو خراجِ تحسین پیش کرنے کے لیے سڑکوں پر نکل آئے ہیں۔
22 سال کا طویل انتظار ختم: آرسنل نے انگلش پریمیئر لیگ کا تاج پہن لیا، تاریخ رقم
