نوابشاہ (رپورٹ: نفیس آرائیں) کمشنر شہید بینظیرآباد ڈویژن شہمیر خان بھٹو کی زیرِ صدارت نوشہروفیروز ٹاؤن کے ماسٹر پلان پر عملدرآمد کے سلسلے میں ایک اہم اجلاس کمشنر آفس کے کمیٹی روم میں منعقد ہوا، جس میں شہری ترقی، بنیادی سہولیات کی فراہمی اور ترقیاتی منصوبہ بندی سے متعلق امور کا تفصیلی جائزہ لیا گیا۔اجلاس میں نوشہروفیروز ٹاؤن کے ماسٹر پلان پر ہونے والی پیش رفت، سڑکوں کی تعمیر و مرمت، نکاسیٔ آب، پینے کے صاف پانی کی فراہمی، ٹریفک مینجمنٹ اور دیگر شہری سہولیات سے متعلق منصوبوں پر غور کیا گیا۔ اس موقع پر اسسٹنٹ ڈائریکٹر پلاننگ اینڈ ڈویلپمنٹ علی مراد ابڑو اور کنسلٹنٹ سید بابر علی شاہ نے ماسٹر پلان کے مختلف پہلوؤں پر بریفنگ دیتے ہوئے درپیش مسائل، تکنیکی امور اور مجوزہ تجاویز سے اجلاس کو آگاہ کیا۔کمشنر شہید بینظیرآباد ڈویژن شہمیر خان بھٹو نے اجلاس سے خطاب کرتے ہوئے کہا کہ ماسٹر پلان پر مؤثر اور بروقت عملدرآمد سے شہری مسائل کے دیرپا حل، منظم شہری ترقی اور عوام کو جدید و معیاری سہولیات کی فراہمی کو یقینی بنایا جا سکتا ہے۔ انہوں نے متعلقہ اداروں کو ہدایت کی کہ باہمی رابطوں کو مزید مؤثر بنایا جائے اور تمام ترقیاتی منصوبے مقررہ مدت میں مکمل کیے جائیں۔کمشنر نے کہا کہ اعلیٰ حکام کو مراسلہ ارسال کیا جائے گا کہ نوشہروفیروز کو ٹاؤن کمیٹی سے ٹاؤن میونسپل کمیٹی کا درجہ دیا جا چکا ہے، لہٰذا بڑھتی ہوئی آبادی اور شہری ضروریات کو مدِنظر رکھتے ہوئے ماسٹر پلان پر نظرِ ثانی کی جائے تاکہ مستقبل کی ضروریات کے مطابق شہری سہولیات کی فراہمی کو یقینی بنایا جا سکے۔انہوں نے ڈپٹی کمشنر نوشہروفیروز کو ہدایات جاری کرتے ہوئے کہا کہ ٹی او آرز کے تحت ہیلتھ، ایجوکیشن، پبلک ہیلتھ، ورکس اینڈ سروسز سمیت دیگر متعلقہ محکموں کے افسران پر مشتمل الگ الگ کمیٹیاں تشکیل دی جائیں، جو ماسٹر پلان کو مدِنظر رکھتے ہوئے اپنے اجلاس منعقد کریں اور اپنی رپورٹس آئندہ اجلاس میں پیش کریں۔کمشنر نے مزید ہدایت کی کہ ماسٹر پلان میں شامل تمام ادارے اپنے اپنے محکموں کی جانب سے جاری ترقیاتی سرگرمیوں اور پیش رفت پر مبنی پروگریس رپورٹس جمع کرائیں تاکہ ترقیاتی اقدامات کی مؤثر نگرانی اور عملدرآمد کو یقینی بنایا جا سکے۔اجلاس میں فیصلہ کیا گیا کہ متعلقہ ادارے اپنی تجاویز اور ورکنگ پیپرز جلد از جلد مکمل کرکے جمع کرائیں گے تاکہ ماسٹر پلان کے تحت ترقیاتی منصوبوں کو مؤثر انداز میں آگے بڑھایا جا سکے۔
اجلاس میں ایڈیشنل کمشنر ٹو سید عمار حسین، ڈپٹی کمشنر نوشہروفیروز محمد ارسلان سلیم، چیئرمین ٹاؤن میونسپل کمیٹی کاشف میمن، ریجنل ڈائریکٹر عبدالعلیم، پی ایچ ای، ہائی ویز، بلڈنگز، لوکل گورنمنٹ، پلاننگ اینڈ ہاؤسنگ سمیت متعلقہ اداروں کے افسران نے شرکت کی۔