ساڑھے تین سوسے زائد گینیز ورلڈ ریکارڈز اپنے نام رکھنے والے اس امریکی شخص نے اس بار اسکیٹ بورڈ کو اپنی ٹھوڑی پر ایک گھنٹے سے زیادہ دیر تک بیلنس کر کے نیا عالمی ریکارڈ بنا ڈالا۔
ڈیوڈ رش (جو پہلے بھی ٹھوڑی پر مختلف چیزیں توازن کے ساتھ رکھنے کے کئی ریکارڈ توڑ چکے ہیں) نے بتایا کہ جیسے ہی انہیں پتا چلا کہ اسکیٹ بورڈ بیلنس کرنے کی کیٹیگری تو موجود ہے مگر ابھی تک کسی نے ریکارڈ قائم نہیں کیا، انہوں نے فورا یہ چیلنج قبول کر لیا۔
ڈیوڈ رش کا مزاحیہ انداز میں کہنا تھا کہ شروع میں ہی مجھے اندازہ ہو گیا کہ اصل مسئلہ کیا ہے، اسکیٹ بورڈ حیرت انگیز حد تک نوکیلی چیز ہے۔ صرف 30 سیکنڈ تک اسے سنبھالنا بھی شدید تکلیف دہ تھا۔
بعد میں ان کے ایک دوست، جس کے پاس اسکیٹ بورڈز کا بڑا کلیکشن تھا، نے انہیں ایک ایسا بورڈ ادھار دیا جس کا کنارہ نسبتا ہموار تھا لیکن پھر بھی ریکارڈ کے سائز اور وزن کے قوانین پر پورا اترتا تھا۔
آخرکار انہوں نے اسکیٹ بورڈ کو اپنی ٹھوڑی پر 1 گھنٹہ، 1 منٹ اور 36 سیکنڈ تک متوازن رکھا اور یوں ایک اور عالمی اعزاز اپنے نام کر لیا۔