گوجرانوالہ :افسران کی سیکرٹری گوجرانوالہ بار حق نواز ہنجرا کے خلاف درج FIR خارج کرنے اور ڈی ایس پی کے خلاف محکمانہ کارروائی کرنے کی یقین دہانی، وکلاء نے ہڑتال کی کال واپس لے لی۔
ڈسٹرکٹ بار ایسوسی ایشن گوجرانوالہ نے سیکرٹری بار زین احمد ملک کے خلاف مقدمہ درج ہونے پر آج مکمل ہڑتال اور عدالتوں کے بائیکاٹ کا اعلان کیا تھا، تاہم سی پی او گوجرانوالہ کی بار میں آمد اور مطالبات تسلیم کیے جانے کے بعد احتجاج مؤخر کر دیا گیا۔ وکلا برادری کے مطابق 11 مئی 2026 کو بار عہدیدار زین احمد ملک کے خلاف ایف آئی آر درج ہونے پر شدید ردعمل سامنے آیا، جس کے بعد وکلا نے متعلقہ پولیس افسران کے خلاف کارروائی کا مطالبہ کیا۔ بار ایسوسی ایشن نے ڈی ایس پی ٹریفک کے خلاف احتجاجی تحریک چلانے کا عندیہ بھی دیا تھا۔ صورتحال اس وقت تبدیل ہوئی جب سی پی او گوجرانوالہ خود بار پہنچے اور وکلا سے مذاکرات کیے۔ ذرائع کے مطابق سی پی او نے ڈی ایس پی کے خلاف تادیبی کارروائی کی یقین دہانی کرواتے ہوئے وکلا کے مطالبات تسلیم کیے، جس پر بار نے ہڑتال اور احتجاج عارضی طور پر موخر کرنے کا اعلان کر دیا۔ دوسری جانب اس واقعے نے ایک بار پھر پولیس کے رویوں پر بحث چھیڑ دی ہے۔ شہری و سماجی حلقوں کا کہنا ہے کہ عام اور کمزور شہریوں کے خلاف فوری مقدمات اور سخت کارروائیاں تو دیکھنے میں آتی ہیں، مگر بااثر افراد کے معاملات میں اکثر احتیاط اور نرمی برتی جاتی ہے۔ ناقدین کے مطابق قانون کا یکساں اطلاق ہی عوامی اعتماد کی بحالی کا واحد راستہ ہے۔ قانونی ماہرین کا کہنا ہے کہ ایسے معاملات میں شفاف اور غیر جانبدارانہ تحقیقات ناگزیر ہیں تاکہ اداروں کی ساکھ برقرار رہے اور انصاف ہوتا ہوا بھی دکھائی دے۔