لاہور:وزیر اعلیٰ پنجاب مریم نواز سے اکیڈمی ایوارڈ (آسکر)یافتہ پاکستانی نژاد فلمساز، جرنلسٹ شرمین عبید چنائے نے ملاقات کی ہے۔ وزیراعلیٰ نے عالمی شہرت یافتہ فلمساز شرمین عبید چنائے کا خیر مقدم کیا اور شرمین عبید چنائے کی پیشہ ورانہ کامیابیوں اور مہارت کو سراہا۔
وزیراعلیٰ مریم نواز نے صحافیانہ دستاویزی فلم سازی سے سماجی مسائل اجاگر کرنے کے عمل کو قابل تحسین قرار دیا۔ فلمساز شرمین عبید چنائے نے وزیراعلیٰ مریم نواز کی فن و ثقافت کیلئے خدمات پر خراج تحسین پیش کیا۔ملاقات میں این ایس آئی ٹی سٹی میں پنجاب فلم سٹی کے منصوبے پر تبادلۂ خیال اوراشتراک کار پراتفاق کیا گیا۔
وزیراعلیٰ مریم نواز نے کہا کہ پنجاب فلم سٹی پراجیکٹ پاکستان کا پہلا ”اینڈ ٹو اینڈ“ میڈیا پروڈکشن ہب بنے گا۔ پنجاب فلم سٹی پراجیکٹ میں فلم، ٹی وی، ڈیجیٹل میڈیا وی ایف ایکس اور پوسٹ پروڈکشن کی سہولت فراہم کریں گے۔پنجاب فلم سٹی میں جدید اسٹوڈیوز، ساؤنڈ اسٹیجز، پوسٹ پروڈکشن لیبز، شوٹنگ سپاٹ،جھیل بھی بنائیں گے۔ پنجاب فلم سٹی میں کنونشن ہال، میڈیا ٹریڈ ہب اور فلم و میوزک سکول بھی بنا رہے ہیں۔
وزیراعلیٰ نے پی ایچ اے کو مینار پاکستان، ڈیجیٹل ہسٹری میوزیم کی بحالی کی ہدایت بھی کی ہے۔
فلمساز شرمین عبیدچنائے نے کہا کہ وزیراعلیٰ مریم نواز بہت اچھا کام کرہی ہیں۔ دہائیوں بعد بسنت فیسٹیول کا انعقاد وزیراعلیٰ کی کاوش کا مرہون منت ہے۔ بسنت میلے میں ہالی ووڈ کی نمایاں شخصیات بھی دلچسپی کا اظہار کر چکی ہیں۔بسنت میلے کو عالمی سطح پر متعارف کرانے کے لئے اگلے سال ہالی ووڈ سٹار کو باقاعدہ مدعو کیا جائیگا۔ پنجاب میں ہارس اینڈ کیٹیل شو کا احیاءقابل تحسین ہے، میلوں میں عوام کو معیاری تفریح کے مواقع میسر ہوتے ہیں۔ وزیراعلیٰ مریم نواز کی لیڈر شپ مثالی ہے،کراچی کے عوام بھی معترف ہیں۔