غزہ کی پٹی میں بدھ کے روز اسرائیلی فضائی حملوں میں ایک ہی خاندان کے تین افراد سمیت کم از کم چار فلسطینی ہلاک ہو گئے۔ ہلاک ہونے والوں میں ایک چھ سالہ بچی بھی شامل ہے۔
فلسطینی محکمہ صحت کے حکام کے مطابق وسطی غزہ کے شہر دیر البلح میں ایک رہائشی عمارت پر اسرائیلی فضائی حملے میں عمر ابو قاسم، ان کی اہلیہ اسماء اور ان کی چھ سالہ بیٹی حبیبہ ہلاک ہو گئیں جبکہ ان کا بیٹا زخمی ہو گیا۔
اسرائیلی فوج نے دعویٰ کیا کہ حملے کا ہدف حماس کا ایک جنگجو تھا۔
ادھر غزہ شہر کے محلے شیخ رضوان میں بھی ایک اسرائیلی فضائی حملے میں ایک اور فلسطینی جان کی بازی ہار گیا۔ اس واقعے پر اسرائیلی فوج نے فوری طور پر کوئی تبصرہ نہیں کیا۔
غزہ کے محکمہ صحت کے مطابق اکتوبر میں اسرائیل اور حماس کے درمیان جنگ بندی نافذ ہونے کے بعد سے اب تک اسرائیلی حملوں میں ایک ہزار سے زائد فلسطینی ہلاک ہو چکے ہیں، جن میں اکثریت عام شہریوں کی ہے۔ دوسری جانب اسی عرصے کے دوران غزہ میں مسلح افراد کے حملوں میں چار اسرائیلی فوجی بھی مارے گئے۔
