راچڈیل: (حافظ نعیم سے ) راچڈیل کے تاریخی ٹاؤن ہال میں پاکستان سے آئے ہوئے وائس چیئرمین اوورسیز پاکستانیز کمیشن پنجاب بیرسٹر امجد ملک اور سینئر صحافی و اینکر پرسن سہیل وڑائچ اور کا پرتپاک استقبال کیا گیا۔
استقبالیہ تقریب میں سابق میئر راچڈیل کونسلر شکیل احمد، مسلم لیگ (ن) برطانیہ ٹریڈ ونگ کے صدر چوہدری خالد محمود، محمد عابد سمیت کمیونٹی رہنماؤں نے مہمانوں کو خوش آمدید کہا اور پھولوں کے گلدستے پیش کیے۔میئر راچڈیل کونسلر جینیٹ ایمسلے نے اپنے دفتر (میئر پارلر) میں معزز مہمانوں کے اعزاز میں تقریب کا اہتمام کیا۔ تقریب میں مقامی صحافیوں، کاروباری شخصیات اور کمیونٹی نمائندگان نے بھی شرکت کی، جن میں ریٹائرڈ بریگیڈیئر ارشد ملک، بلال رزاق، خواجہ کامران، چوہدری عارف پندھیر، مرزا ہارون، خالد چوہدری، نعیم ملک اور دیگر شامل تھے۔سابق میئر شکیل احمد نے مہمانوں کو تاریخی ٹاؤن ہال کی تاریخ و ورثے پر بریفنگ دی۔
دورے کے دوران مہمانوں اور میزبانوں کے درمیان باہمی دلچسپی کے امور پر تبادلہ خیال ہوا۔اس موقع پر سہیل وڑائچ اور بیرسٹر امجد ملک نے میئر راچڈیل اور مقامی کمیونٹی کے شاندار استقبال پر شکریہ ادا کرتے ہوئے کہا کہ اس طرح کے دورے دونوں ممالک کے درمیان تعلقات کو مزید مضبوط بنانے اور اوورسیز پاکستانیوں کے مسائل کو اجاگر کرنے میں اہم کردار ادا کرتے ہیں۔